Республикæйы дарддæр æвзарынц æрыгон спортсменты футболы академи «Алания»-мæ. Кæсынц алы кары футболисттæм. Йæ спортивон арæхстдзинад чи æвдисы, уыдонæн фидæны ис фадат хуыздæр профессионалон командæты хъазын. Сывæллæттæ æрвылбон архайынц ног фæлтæрæнты. Æвзæрстыты фæстæ ам баззайдзæн 25 спортсмены. Ахуыр кæндзысты лæвар. Бæлвырддæр нæ дарддæры æрмæджы.
Æрыгон футболисттæ июльмæ рагæй æнхъæлмæ кастысты. Футболы академи «Алания»-йы ацы мæй цæуынц æвзарæн къæпхæнтæ. Сæ тыхтæ бафæлварынмæ фæсивæд æрбацыдысты республикæйы алы районтæй.
Битарты Роберт, футболы академи «Алания»-йы директор: «Ныридæгæн æмбырд кæнæм хъомылгæнинæгты. Фыццаг уал æркастыстæм, раздæр дæр чи цыд академимиæ, уыцы фæсивæды арæхстдзинадмæ. Ныр та сабиты рад у – 2009-æм азæй 2012-æм азы онг чи райгуырд, уыдон».
Академийы разамонæг ма куыд фæнысан кодта, афтæмæй афæдзы дæргъы тренертæ лæмбынæг кастысты, 12 азы кæуыл цæуы, уыцы футболисттæм. Ныр сæ арæхстджындæртæн фæзынд фадат тренировкæ æмæ ахуыр кæнын федералон фæрæзты фæрцы.
Битарты Роберт, футболы академи «Алания»-йы директор: «Сентябры академимæ æрбацæудзысты 2009-æм азы чи райгуырд, уыцы фæсивæд. 25 æрыгон футболисты сæхи цæттæ кæндзысты ам. Академийы сын ис цæрыны фадат дæр».
Æндæр кары сывæллæттæм дæр къаддæр æргом здæхт нæ цæуы. Уый тыххæй æвзæрстытæ сты цалдæр къæпхæнæй арæзт. Фыццаг уал кæсынц физикон цæттæдзинадмæ, уый фæстæ та футболæй хъазыны практикæмæ. Хистæр тренер Карсанаты Умар куыд фæбæрæг кодта, афтæмæй ма ахæм æркастытæ цæудзысты афæдзы дæргъы.
Карсанаты Умар, футболы академи «Алания»-йы хистæр тренер: «Фæлварæнтæ скæнæм сывæллæттæн – куыд згъорынц, куыд гæпп кæнынц. Чи у цырддæр? Алыхуызон хъæзтытæ сын саразæм. Уый иу бон æмæ иу къуырийы куыст нæу. Дарддæр та турниртæ уыдзæн, цæмæй сæ арæхстдзинад хуыздæр равдисой. Уымæй уылдай, ахсджиаг у, цæмæй футболист, фæзмæ рахизгæйæ, тагъд æмæ раст хъуыды кæна. Æмæ уый дæр амонæм».
Академийы ныридæгæн ис бирæ раппæлинаг футболисттæ. Хистæр кары фæсивæдæй снысан кодтой футболон клуб «Алания-2»-йæн уæлæмхасæн къорд. Ныридæгæн республикæйы 2-æм командæйы академийы хъомылгæнинæгтæй хъазынц æртæйæ.
Битарты Роберт, футболы академи «Алания»-йы директор: «Нæ футболисттæй æртæ хъазынц «Алания-2»-йы. Дарддæр сæхæдæг æмæ сæ курдиат. Сæхи куыд равдисой, афтæ ацæудзæн сæ æнтыстыты фæндаг».
Футболы академи «Алания» кусы æрмæст афæдз. Уыцы рæстæгмæ республикæйы футболы райрæзтмæ стыр æвæрæн бахаста.
