Хъобаны цæрджытæ ныр дыууæ азы дæргъы æнæ къуылымпыйæ пайда кæнынц телефоны бастдзинадæй. Раздæр та цæмæй хæтæлæй бадзурай, уый тыххæй-иу сæ къорд рæстæг хъуыд сигнал ахсын. Ныр уавæр цæхгæр фæивта. Ис сæм тагъд инетрнет 4G.
Бирæ азты дæргъы цæрджытæ нырыккон техногологитæ æмæ хорзæхтæй, ис афтæ зæгъæн, æмæ уыдысты иппæрд. Уыцы хъуыддаг сраст кæныныл кусынц къæпхæнгай. Федералон программæйы руаджы интернет уадзынц Цæгат Ирыстоны æппæты дæрддзæф хъæутæм дæр.
Программæйы фæлгæты æппæт фæсарæйнаг кусæнгæрзтæ дæр архайынц нæ бæстæйы уагъд системæтыл баивын. Зæгъæм, Уæрæсейы конд ифтонггарз “Булат”, ацы станцæйыл нæ ахадынц санкцитæ. У ДЗЫ æнцон пайдагæнæн, йæ бастдзинад сыгъдæг, уæдæ интернет дæр кусы рæвдз.
Хъобаны цæры 350 адæймаджы бæрц. Хъæуыхицауы ныхасмæ гæсгæ, ацы бастдзинадæй пайда кæнынц æхсызгонæй. Уæвгæ, туристты дæр нæ хъыгдары. Республикæйы уазджытæн хæрзхъæд интернет у уæлдай ахсджиаг.
Рæстæджы домæнтимæ æмдзу кæнын не ‘нтыст Хохы Санибайы цæрджытæн дæр. 2022-æм азы сæ бирæ нал хъуыд программæйы фæуæлазиз уæвынмæ. Цалдæр афæдзы фæстæ интернет бауадзыныл сæ хъæлæс радтой 918 адæймаджы. Куыд хатдзæг, афтæ бындурон станцæ. 2025-æм азы сæ къухы бафтыд нырыккон хорзæх. Хъæуы дæргъ у 3 километры бæрц æмæ дзы алы ран дæр бастдзинад ис.
Кертанты Алан у амалхъом адæймаг. Хохы Санибайы сарæзта дыууæ нырыккон хæдзары. Куыд дзуры, афтæмæй туристты зæрдæмæ цæуы нæ æрдз, хæхтæ æмæ уæлдæф, фæлæ куы æрбацæуынц, уæд фыццаджы дæр бафæрсынц, зæгъгæ, интернет ис æви нæ, уый. Æмæ кæд раздæр къуылымпыдзинæдтæ ‘ййафтам, уæд ныр нæ бон зæгъын у, ацы зындзинад иуварсгонд кæй æрцыд.
Интерет цы хъæутæм уадзынц, уыдоны нымæц фылдæр кæны æрвылмæй. Дзынагъа, Махческ, Кусово æмæ Стыр Дыгуры дæр куыстытæ кæронмæ æрхæццæ кæнынц. Æдæппæтæй 10 азмæ проекты фæлгæты “Ростелеком” ауагъта бастдзинады хæтæлты 122 мин километры бæрц.
