Дзæуджыхъæуы ацыд радон аппаратон æмбырд, амыдта йæ республикæйы сæргълæууæг Сергей Меняйло. Ныртæккæ сæйрагдæр у эпидемиологон уавæр. Æппынæдзух хъæуы хъус дарын, цæмæй республикæйы дзæбæхгæнæндæттæ медицинон туаггуыр æмæ хостæй ифтонггонд уой. Хицауады уæнгтæ æмæ муниципалон скондты разамонджытæ ма æрдзырдтой ахуырад æмæ спорты фарстатыл.
Коронавирусæй рынчынты нымæц æмæ инфекцийы парахат кæд чысыл фæкъаддæр, уæддæр республикæйы эпидемиологон уавæр нырма у зæрдæхсаинаг. Сергей Меняйло куыд фæнысан кодта, афтæмæй æдасдзинады домæнтæ хъæуы фæкарздæр кæнын. Уæлдай лæмбынæгдæрæй хъус æрдарын районтæм. Цæрджытимæ æппынæдзух хъæуы æмбарынгæнæн ныхас кæнын, цæмæй æхсæнадон бынæтты, чындзæхсæвтӕ æмæ зианты бирæгæйттæй ма ‘мбырд кæной. Регионы разамонæг ма фæсидт республикæйы поликлиникæты куыст студенттæ-медиктæй фæтыхджындæр кæнын. Уыдон дохтыртæн æххуыс кæндзысты амбулаторон пациенттимæ архайгӕйӕ.
Хицауады уæнгтæ æрдзырдтой медицинон туаггуырæй ифтонгадыл дæр. Ацы къуыри республикæйы дзæбæхгæнæндæттæм æрласдзысты туаггуыры концентраттæ. Уымæй уæлдай ма хæстæгдӕр рæстæг бафысдзысты бадзырд туаггуыры станцæтæ балхæныны тыххæй.
Ахсджиаг фарстаты ‘хсæн ахуырад дæр. Январæй йæ тыхы бацæудзæн ахуыргæнджытæн мызд фидыны ног системæ. Сергей Меняйло профилон министрадæн бабар кодта, республикæйы сæргълæууæджы номæй цы уæлæмхасæн фиддонтæ исдзысты, уыдонæн рагхыгъд скæнын. Аппаратон æмбырды ма фехъусын кодтой, микрорайон «Новый Город»-ы 550 сывæллонæн скъола кæй сараздзысты, уый. Уыцы хъуыддагæн рахай кæндзысты 600 милуан сомы. Регионы разамонæнг дзуаппдæттæг ведомствотæн бабар кодта ног ахуыргæнæндоны арæзтадæн хуыздæр проект равзарын.
Аппаратон æмбырды ма æрдзырдтой рæзгæ фæлтæры ‘хсæн спорт парахат кæныны хъуыддагыл. Сергей Меняйло рахаста фæндон алы скъолайы дæр футболы командæтæ саразын, цæмæй сӕ кӕрӕдзийы ‘хсӕн ерыс кӕной республикæйы сæргълæууæджы призыл.
