8-æм ноябрæй Уæрæсейы сфидар кæндзысты, адӕймаг коронавирусы инфекци хиуыл кӕй бавзӕрста кæнæ вакцинаци кӕй ацыд, уый ӕвдисӕг сертификатты ног хуыз.
Бардзырд æвæрд æрцыд нæ бæстæйы æнæниздзинад хъахъхъæнынады министрады барадон хъусынгæнинæгты официалон интернет-порталы. Вакцинаци кӕнӕ ревакцинаци чи ацыд, уыдонӕн сӕ сертификатты фыст цæудзæн прививкæ скæныны бон, медицинон уагдон, уыимæ ма, привикæйы хуыз æмæ йӕ бæрæггæнæнтæ. Нысангонд дзы уыдзæн, йе ‘нæниздзинады бæрæггæнæнтæм гæсгæ, вакцинаци ацæуæн кæмӕн нæй, уый дӕр. Йӕ бæлвырд аххосæгтæ, стæй йе ‘мгъуыд.
Æппæт бæрæггæнæнтæ дæр уыдзысты уырыссаг æмæ англисаг æвзæгтыл фыст. Раздæры сертификаттæ се ‘ппæт дæр ивд ӕрцӕудзысты 2022 азы 1 мартъийы онг. QR-кодимæ гæххæт райсæн уыдзæн бирæвæрсыг центры вакцинацийы ацыдӕй 3 боны фæстæ. Электрон хуызы та — паддзахадон лæггæдты порталы. QR-кодтæй пайда кæныны æмгъуыд у иу аз. Æрæджы пайдагæнджытæ хъаст кодтой, уыцы æмгъуыд кæй фӕцыбырдӕр кодтой 6 мæйы онг, зæгъгæ.
Фæлæ, ведомствойы куыд фехъусын кодтой, афтæмæй æрцыд техникон къуылымпыдзинæд. Ныртӕккӕ паддзахадон лæггæдты портал кусы, куыд æмбæлы, афтæ. QR-кодтæ ивынц.
