Райсомæй фæстæмæ уарæн пункты дæсгай адæм. Урссаджы продукци алкæддæр парахат вæййы. Сывæллæтты продукттæ æнæ химион буаргъæдтæй дуканиты тæрхæджыты ссарын æнцон хъуыддаг нæу. Кæстæрты пайда хæринагыл ахуыр кæнын хъæуы сæ сабийæ фæстæмæ. Ам ныййарджытæ æрвылбон исынц экологон æгъдауæй сыгъдæг æмæ хъæугæ витаминтæй хъæздыг продукттæ.
Цæмæй фараст сахатыл сывæллæттæм пайдайаг хæринаг фæхæццæ кæной, уый тыххæй цехы куыст райдайы райсомы 4 сахатыл. Æппæт продукци специалисттæ цæттæ кæнынц æхсырæй. Рафыцынц æй æмæ йæ уый фæстæ æруазал кæнынц. Сывæллæтты меню цæттæ кæныныл архайынц биотехнологтæ. Уыдон бæстонæй бæрæг кæнынц æппæт архайд дæр. Уæлдай æргом здахынц сыгъдæгдзинадмæ.
Кусджыты нымæц бирæ нæу, 30 адæймагмæ ‘ввахс. Фæлæ чысыл компани æрвылбон цæттæ кæны 5 мин порцийы бæрц æмæ хойрагæй æххæст кæнынц Дзæуджыхъæуы æмæ Беслæны 2 мин сабийæ фылдæр. Ассортимент дисы ‘фтауы. Кастæ, туаг æхсыр, къæдор, йогурт, уагъылыйæ нуазинаг. Цехты ис æппæт хъæугæ ифтонггæрзтæ. Кæд ногтæ не сты, уæддæр сæ куыст æххæст кæнынц.
Афæдзы райдианæй специалисттæ сарæзтой сывæллæтты хæринаджы 200 мин порцийы бæрц. Республикон бюджеты хардзæй хæринаг лæвар исынц æртæ азы онг сабитæ бирæсывæллонджын бинонтæй. Уыимæ æххуысцух æмæ уæззау уавæры чи бахауд, ахæм бинонтæй сывæллæттæ. Æрæджы та ма фадат фæзынц сæрмагонд æфсæддон операцийы архайджыты сывæллæттæн дæр. Уарæн пункттæ кусынц Дзæуджыхъæуы æмæ Беслæны поликлиникæты. Цæгат Ирыстоны æхсыры къæбицæн ис хъæздыг истори. Республикæйы фæзынд суанг 1926-æм азы. Специалисттæ сæ куыст нæ бауырæдтой бæстæйæн уæззаудæр рæстæджы дæр. Фыдыбæстæйы стыр хæст, уыимæ нæуæдзæм азты. Кæддæриддæр сывæллæтты æххæст кодтой пайда æмæ хæрзхъæд продукттæй.
Цæгат Ирыстон у урссаджы продукци бахъахъхъæнын кæм бантыст, ахæм иунæг регион. Объект, æцæг дæр у ахсджиаг, уый фæнысан кодта бæстæйы хицауад дæр. Федерацийы Советы Цæгат Ирыстоны бонты рæстæг Пензæйы облæстæй сенатор фæбæрæг кодта пайда менюйы кондад кæй сног кæнын хъæуы бæстæйы иннæ регионты дæр. Йæ дарддæры рæзтыл ныхас цыд сылгоймæгты цæдисы сæрдар Екатерина Лаховаимæ дæр.
Цæгат Ирыстоны æхсыры къæбицы куыст дарддæр дæр фæнд кæнынц парахат кæнын. Фæхъæздыгдæр æй кæндзысты халсартимæ хæринæгтæй. Зæгъæм, ныридæгæн кусын нассæст цæттæ кæнын райдайыныл. Фылдæр кæнынц меню чи исы, уыдоны нымæц дæр. Пилотон проекты поекты хуызы продукцийæ æххæст кæнынц скъолайы агъоммæ ахуыргæнæндæтты 3 азы онг сывæллæтты. Ахæм практикæ фæнд кæнынц рæзын кæнын.
