Дыгуры районы нартхор бирæ ис. Хуымгæндты 16,5 мин гектарæй ахсы 15 мины.
Быдырты ус-паддзах æй дзæгъæлы нæ рахуыдтой. Хоры культурæты ‘хсæн нартхор хъуыстгонд у æппæты бæрзонддæр хорæрзадæй. Ацы немыцаг комбайн кæрды зæнгтæ. Аппаратмæ бахаугæйæ нартхор йæ хъæдæй фæхицæн вæййы æмæ дзы рауайы сыгъдæг нæмыг.
Ай у холлагнартхор, уымæ гæсгæ йæ тыллæг цæудзæн фосы хæринагæн. Хуымгæнæны фенæн ис уæрæсейаг нартхоры мыггæгты алы хуызтæ. Раздæр уыдысты фæсарæйнаг, фæлæ сын санкциты фæстæ Цæгат Ирыстоны фермертæ ссардтой аккаг ивд. Специалисттæ ныхæстæм гæсгæ сæ ссарæн ис уæрæсейаг базарты. Зæгъæм, Краснодары селекцийы æрмæг.
Æнтæф бонтæ кæй уыд, уый тыххæй быдыртæ бахус сты. Æмæ фермертæн æрхастой стыр зиан. Дыгуры районы та нартхоры фæрцы чи цæры, ахæмтæ чысыл нæ разынд. Хæууон хæдзарады чи архайы æхæм 100 къаннæг хæдзарады æмæ ма уыдонæй еъаудæр чи сты, 25 ахæмы.
Фæстаг мæйы куысты бæрæггæнæнтæ. Иу гектарæй сисынц 5,5 тоннæйы нартхор. Фароны бæрæггæнæнтимæ абаргæйæ, тыллæг у 2 тоннæйы къаддæр. Фæлæ иумæйаг фæстиуæг банымайæн нæмæ ис. Уымæн æмæ быдыртæ нæма бафснæйдтой кæронмæ æмæ куыстытæ кæд фæуыдзысты, уый дæр нæма у бæрæг. Алцыдæр баст у боныхъæдимæ. Нырыккон технопарк сын тынг æххуыс у.
Дыгуры районы ис 30 ног комбайны. Сæ фæрцы быннæтон фермертæ сæхи быдыртæ куы бакусынц, уæд баххуыс кæнынц сыхаг районтæн. Нартхор зындарæн у, фæлæ Цæгат Ирыстоны уарзы.
