Бæрзæйы цæлмартæны тыххæй, адæм æй грыжæ хонынц, къух тынг риссы. Операци, æнæмæнг, хъуыддаг уыд. Нейрохирург Дахир Абуков арæхстгай æвналы, цæмæй астæуыстæджы алыварс дадзинтæ хъыгдæрд ма æрцæуой. Архайы цæлмартæн айсыныл, стыр кæй рауад, уый тыххæй йæ ныддихтæ кодта. Операцийæн бахъуыд 40 минуты.
Ацы операци æртыккаг у, дарддæр ма ноджы дыууæ. Наркозæй сахат фæстæ пациенты къæхтыл слæууын кæнынц, дыккаг бон та йæ хæдзармæ ауадзынц. Уникалон эндоскопон операцитæ Цæгат Ирыстоны медицинон академийы клиникон рынчындоны ныридæгæн кæнынц афæдзы æрдæг. Ацы технологи медиктæ “æрыгон” хонынц. Операцитæ кæнынц бæрзæйы, астæуыстæджы æмæ риуы хæйтты патологитыл. Пациенттæн лæггад кæнынц медицинон фæдзæхстады полисмæ гæсгæ.
Бæрзондтехнологон медицинон æххуыс кæнынц зындгонд нейрохирургтæ Дзебойты Салам æмæ Дахир Абуков. Фæстаг – не ‘мзæххон, Петербургы Павловы номыл медицинон университеты кусæг.
Клиникон рынчындон сси раззагдæр фæзуат Цæгат Ирыстоны медицинон академийы фæрцы. Уæлдæр ахуыргæнæндоны разамынд тынг бацархайдта, цæмæй пациенттæ æмбæлгæ æххуыс исой республикæйы.
Операцитæ фæкæнынц фæлладуадзæн бонты. Цæгат Ирыстоны медицинон академийы клиникон рынчындон ифтонггонд у æппæт хъæугæ кусæнгæрзтæй. Ныридæгæн афæдзы æрдæгмæ баххуыс кодтой 46 пациентæн.
