Цæгат Ирыстоны паддзахадон университеты райдыдта ног ахуыры аз. Ахуыртæ цæудзысты æппæт санитарон домæнтæ хынцгæйæ. Уый тыххæй университеты ис хъæугæ фæрæзтæ. Уæлдæр ахуыргæнæндонмæ бацæуæны студенттæн æмæ ахуыргæнджытæн бардзысты сæ буары тæвд. Тæссаг низы миниуджытæ кæмæ раиртасой, уыдоны мидæмæ нæ уадздзысты. Социалон дистанци æмæ санитайзертæй уæлдай, æнæмæнг, уыдзæн маскæтæ дарыны фæтк.
Хихъахъхъæнæн æууæлтæ студенттæн æнæзонгæ не сты. Фарон дæр ахуыртæ цыдысты сæрмагонд уагæвæрдмæ гæсгæ. Алчидæр сæ æмбары, коронавирусы инфекцимæ куыдфæндыйы цæстæй кæсæн кæй нæй, уый. Уымæ гæсгæ алчидæр архайы санитарон домæнтæ æххæст кæныныл.
