Джазыл æнувыд адæм сæ уарзондæр зарджытæм хъусгæйæ сæ мондæгтæ суагътой. Цæгат Ирыстоны паддзахадон университеты Культурæйы галуаны 19-æм хатт арæзт æрцыд джазы фестиваль. Дунейы хуыздæр æмæ 20-æм æнусы хъуыстгонддæр зарджытæн бауромæн нал уыди. Цы бынат ахсы «зарæг» ацы дæсныйады, уый базыдта не сфæлдыстадон къорд дæр.
Джаз чи уарзы, уыдонæн уалдзæджы фыццаг бонтæ систы æцæг бæрæгбон. Дзæуджыхъæуы хъуыстис рæсугъд зæлтæ – классикæйæ æмæ суанг алыхуызон композицитæй. Фыццаг къухæмдзæгъд айхъуыст паддзахадон национ эстрадон оркестры номыл.
Алы композици дæр – адæймаджы мидварны къæбиц хъæздыггæнæг. Кæмдæр романтикон хуызы, кæмдæр та – худæг. Фестивалы сæйраг архайæг сси америкаг зарæггæнæг Стив Вашингтон. Азарыд ногорлеанаг хуызы. Бирæты ацы зарджытæ ахæссынц Америчы ивгъуыд æнусы æмбисмæ.
Америкаг Зарæггæнæг Стив Вашингтон: «Тынг тыхджын изæр у. Ацы оркестр фæлтæрдджынтæй иу у. Мæ зæрдæмæ цæуы. Дзæуджыхъæу мæ уды баззад, æнæмæнг ма æрыздæхдзынæн ардæм».
Фестивалы æрвылазон архайæг – Къæбойты Лизæ. 8 ирд композицийы – 8 алыхуызон историйы. Загъта, иуæй-иу зарджытæ фестивалы фыццаг хатт кæй азарыди. Йæхи зæрдæмæ дæр фæцыдысты. Фылдæр, Стивимæ дыууæйæ цы зарæг акодтой, уый.
Артистты зæрдæмæ фæцыд адæмы ахаст. Фрэнк Синатрæйы зарджытæ та уæвгæ дæр иумæ акодтой. Бирæтæ ацы фестивалмæ уымæн афтæ зæрдиагæй фенхъæлмæ кæсынц.
Уырыссаг æмæ фæсарæйнаг дæснытæн æмгуыстадæн ис хорз фидæн. Биг бэнды аивадон разамонæг куыд зæгъы, афтæмæй оркестр йæхи цæттæ кæндзæн 20-æм юбилеон фестивалмæ. Цæудзæн иннæ аз. Уæд дæр та дзы рауадзæн стыр бæрæгбон.
