Пауэрлифтинг Цæгат Ирыстоны парахат кæны. Ацы спорты хуызæй æрмæст нæлгоймæгтæ нæ фæлæ ма, дзы сылгоймæгтæ дæр фæлварынц сæхи. Уымæн æвдисæн – Хъодзаты Янæ. Æрæджы Мæскуйы дунеон чемпионатæй пауэрлифтингæй сыздæхт уæлахиздзауæй. Цæгат Ирыстоны иннæ минæвар Дреты Азæмæт та штангæ исынæй дунеон рекорд снысан кодта. Уæлахиздзаутæ нæ сфæлдыстадон къордæн ацы спорты хуызы сусæгдзинæдтæ раргом кодтой. Сæ уæлахизмæ фæндаджы тыххæй радзырдтой. Бæлвырддæр нæ дарддæры æрмæджы.
Хъодзаты Янæйæн йæ алы азмæлд дæр раст æмæ бæстон у. Чызг алыхуызон æмвæзадыл ерысты йæ арæхстдзинад равдисы. Йæхиуыл æнæ ауæрдгæйæ кæй кусы уымæ гæсгæ дунеон чемпионаты пауэрлифтингæй ссис уæлахиздзау.
Хъодзаты Янæ чемпионаты нæ республикæйæ иунæг минæвар нæу. Дреты Азæмæт дæр Цæгат Ирыстонмæ уæлахиздзуауæй ссыд. Уый 75 килограммы уæзы ссис фыццаг. Уыимæ ма лæппу снысан кодта дунеон рекорд штангæ исынæй. Спортсмен куыд зæгъы, афтæмæй ын йæ ног æнтыстдзинад йæ размæ сæвæрдта ног нысæнттæ.
Дыууæ спортсмены дæр сывæллæтты скъола «Урожай»-ы хъомылгæнинæгтæ сты. Ацы спортивон æхсæнадæн хъæздыг истори ис. Ныртæккæ скъолайы сæхи фæлварынц 20 сывæллоны. Уыимæ ма лæвар. Хъодзаты Янæ куыд зæгъы, афтæмæй пауэрлифтинг æмæ армреслингмæ нæ республикæйы се `ргом раздæхтой. Фæлæ уæддæр уый фаг нæу.
Фæсивæдмæ тренеровкæтæ цæуынц къуыри æртæ хатты. Æрыгон спортсментæ ахуыртæй нæ цух кæнынц, уымæн æмæ пауэрлифтинг æмæ армреслинг бирæ уарзынц. Уæдæ сæ уæлахиздзаутæ дæр æнтыстдзинæдтæм разæнгард кæнынц.
Уазиты Зæлинæ
