Цæгат Ирыстоны педагогон колледжы кæронмæ фæхæццæ кæнынц исæн фæлварæнтæ. 200 бюджетон бынаты дæттынц абитуриенттæн. «Дошкольное образование» æмæ «Преподавание в начальных классах», зæгъгæ, здæхтытæм гæсгæ. Ахуыргæнæндонмæ бахауынæн хъæуы хæслæвæрдтæ баххæст кæнын. Æрыгон адæм бæстон æвзæрст цæуынц. Къамисы уæнгтæм ис сæрмагонд домæнтæ. Цавæртæ, уый тыххæй нæ дарддæры æрмæг.
Фæлварæнты рæстæг хъæуы æмдзæвгæ радзурын. Къамис афтæмæй бæрæг кæны абитуриенты дикци. Фидæны ахуыргæнæг хъуамæ аив æмæ æмбаргæ ныхас кæна. Малиты Альбинæ бацæттæ кодта Сергей Есенины уацмыс “Письмо к женщине”.
Æмныхасад ахæм хуызы арæзт цæуы дыууæ дæсныйады абитуриенттимæ. “Скъолайы агъоммæ ахуырад” æмæ “Райдиан кълæсты ахуыргæнæг”. Къамисы уæнгты размæ ахсджиаг хæс æвæрд ис. Æрыгон адæмы ‘хсæн раиртасын хъæуы ацы дæсныйад бæлиццаг кæмæн у æмæ йæм æппын “нæ”- йы бæсты чи нæ цæуы, уыдоны. Цæгат Ирыстоны педагогон колледжы студент хъуамæ тырна ног зонындзинæдтæм æмæ сæ дарддæр сабиттæн дæтта.
Фæлварæны цавæр хæслæвæрдтæ уыдзæн, уый тыххæй фæсивæдæн радзурынц консультанцийы. Фæрстытæ æрмæст дæсныйадимæ баст вæййынц. Цавæр хъуамæ уа нырыккон ахуыргæнæг? Зындæр хæслæвæрд, бæлвырд уавæры раст сарæхсын. Ахсджиаг у хи тыххæй информаци дæр. Ныййарджытæ стыр тых дæттынц абитуриенттæн. Специалисттæ сын бамбарынц кæнынц ахуырты хицæндзинæдтæ.
Ахуырмæ исынц фарæстæм æмæ иуæндæсæм кълæсты рауагъдонты. Колледжы куыд зæгъынц, афтæмæй ахуыргæнæджы дæсныйады кад фæстæмæ зæдæхы. Сæ документтæ балæвæрдтой Уæрæсейы иннæ регионты цæрæг сывæллæттæ. Фылдæр кæнынц иттæг хорз бæрæггæнæтимæ æвдисæндарты хицæуттæ. Бирæтæ дæргъвæтин кæнынц ацы дæсныйады сæ бинонтæй рацæуджыты фæндаг. Колледжы йæ æмбарынц сæ хъомыс кæй хъæддыхдæр кæны, уый. Уавæртæ хуыздæр кæнынц. Астæуккаг профессионалон ахуырады кусæндон федеарлон проект “Профессионалитет”-мæ гæсгæ, рамбылдта грант. Ныридæгæг 70 милуан сомæй спайда кодтой 6 лаборатори байгом кæныныл.
Бюджетон бынæттæ сты 200. Ахуыргæнæндоны студент суæвæн ис. Æрмæст хи хъæуы бæстон бацæттæ кæнын. Фæлварæнæн æппæт тыхтæ раттын. Ахуырадон процесс цымыдисагдæр рауайдзæн. Практикæйы рæстæг фыццæгæм курсæй фæстæмæ фæфылдæр кæндзысты дыууæ хатты. Педагогон колледжы зæрдыл лæууын кæнынц, документтæ бадæттæн ма абон кæй ис, уый. Къамисы домæнты тыххæй бæлвырддæр базонæн ис официалон сайты. Ахуыртæм кæй райсдзысты, уыдоны номхыгъд дæр 17 авгуысты равæрдзысты уым.
