Æндадзджытæ, сисамайджытæ, электромонтажниктæ – 2026-æм азы æрфарстыты хатдзæгтæм гæсгæ ацы дæсныйæдтæ сты æппæты агургæ. Кусгæ здæхтыты кад ногæй раздæхт. Хорз специалистæн сæ мызд дæр фылдæр у, æмæ сæм заказтæ та цалдæр мæймæ раздæр вæййы. Æркаст “Строймастер”- ы сæйраг нысан у курдиатджын æмæ ныфсджын фæсивæд рабæрæг кæнын æмæ сæм фæкæсын. Кокайты Сергей – сисамайæг профилон ахуырад æм нæй, фæлæ æххæст у 5 азы онг фæлтæрддзинадæй.
Размæ цæуын ын æххуыс кæнынц æмкусджытæ. Кæрæдзийæн фæлтæрддзинадæй фæхай кæнын пайда у. Архайджытæ цæттæ сты фæлварæнтæм æмæ æмгуыстадмæ. Профилон ахуыргæнæндæтты студенттæ æмæ ацы куыст йæ зæрдæмæ кæмæн цæуы, уыдон ерыс кæнынц 4 здæхты: сæрдæг, æндадзæг, сисамайæг. Фæстаг дыууæ фæзуаты цæуынц Дзæуджыхъæуы арæзтадон техникумы.
Архайджыты баххæст кæнын хъæуы техникон хæслæвæрд. Жюри сын цы домæнтæм гæсгæ аргъ кæндзæн, уыдон æппæт фыст ‘сты. Зæгъæм, пеноблокмæ цæуы сæрмагонд клей, вертикалон хуыдвæдтæ та хъуамæ уой монтажгæнæн пенæйæ фидар. Архайд арæзт у цалдæр къæпхæнæй.
Иу номинацийы архайынц 5-7 адæймаджы. Уæлахиздзаутæ бæрæггонд æрцæудзысты. Уыцы иу рæстæг æркаст аразынц Дагестаны, Грознайы æмæ Цæгат Кавказы федералон зылды æндæр регионты. Ассоциаци “Республиканское объединение строителей Алании”-йы генералон директор Куыдзойты Фидар куыд фæнысан кодта, афтæмæй æрвылаз нæ республикæйы дæснытæ бацахсынц раззагдæр бынæттæ, сæхи равдисынц бæрзонд æмвæзадыл.
2026-æм аз республикæйы сæргълæууæг Сергей Меняйло снысан кодта архитектурæйы афæдзæй. Æркасты сæйраг нысан – фæсивæды кусаг дæсныйадтæм сразæнгард кæнын. Уымæй уæлдай ма студенттæн æмæ скъоладзаутæн фадат дæтты хи ахсджиаг здæхтыты бафæлварынæн.
КЦОЙТЫ ТАМИЛÆ, ДУДАЙТЫ АРСЕН
