Сабибонтæй фæстæмæ Дзидзойты Валерияйы фыды фыды фæндыд, цæмæй йæ кæстæр фидæны суа дохтыр. Юстициты хистæр уынаффæгæнæг, булкъон Дзидзойты Анатолий прокуратурæйы куыстæн снывонд кодта 33 азы. Йæ хъуыдымæ гæсгæ ацы дæсныйад сылгоймаджы нæу. Фæлæ чызг йæ бæллицыл йæ зæрдæ нæ ивта. Уæндон къахдзæфтæ йæм кодта. Стыр дæнцæг ын уыд йæ фыд.
2016-æм азы Валерия бацыд Кутафины номыл Мæскуыйы юридикон академимæ. Бакалавриат каст куы фæцис, уæд прокуратурæйы институты райста магистры ном. Нæ республикæмæ ссыд æмæ ныр дыууæ азы кусы йæ дæсныйадмæ гæсгæ. Службæ райдыдта иумæйаг цæстдардæй. Ныридæгæн у паддзахадон азымдар æмæ Дзæуджыхъæуы Цæгат-Ныгуылæн районы прокуроры æххуысгæнæг.
Йæхи дæнцæгæй Валерия равдыста,прокуратурæйы сылгоймагæн дæр бынат кæй ис, уый. Лейтенант службæ кæны прокурор Плиты Вадимы цæстдарды бын. Сылгоймаджы ныхæстæм гæсгæ, йæ разамонæг ын кæддæриддæр æххуыс кæны æппæт фарстатæ дæр аиуварс кæнын.
Районы прокурор æй хорз хъуыды кæны йæ куысты райдиан. Хистæр æмкусджытæ йын куыд æххуыс кодтой. Ныридæгæн йæ фæлтæрддзинад не ‘вгъау кæны кæстæр специалисттæн. Архайы сын амынддзинæдтæ радтын. 20 азмæ йын райхалын бантыст къорд хъуыддаджы. Административон райдай æмæ уголовонтæй фæуы. Йæ куысты фæтк — йæ царды иу хай. Фæлæ йын хæссы æрмæст æхцондзинад.
Цæгат Ирыстоны прокуратурæ фæндзæм августы бæрæг кæны æнусон юбилей. Ныридæгæн системæйы кусы 400 адæймагæй фылдæр. Сæдæ азмæ бирæ фæивта, фæлæ æнæивгæйæ баззад иу хъуыддаг — закъонæн лæггад кæнын, фæткæвæрд фидардæр кæнын æмæ цæрджыты бартæ хъахъхъæнын.
