Цæгат Ирыстоны сбæлвырд сты Иумæйаг паддзахадон фæлварæнты фыццаг бæрæггæнæнтæ. 100 баллы чи райста, ахæм съоладзаутæ дæр разынд. 6 рауагъдоны уæлдæр бæрæггæнæн райстой уырыссаг æвзагæй, 6-æй химийæ æмæ 1 адæймаг та профилон математикæйæ. Се ‘хсæн Дзæуджыхъæуы 43-æм скъолайы рауагъдон Плиты Сæрмæт дæр. Йæ райгуырæн скъолайы сси фыццаг 100 баллы чи райста, ахæм. Зын фæлварæн раттынмæ йæхи цæттæ кодта цалдæр азы.
Фæлварæнты рæстæг рауагъдонтæй къаддæр нæ тыхстысты сæ ныййарджытæ æмæ ахуыргæнджытæ. Нæ дызæрдыг кодтой, Сæрмæт уæлдæр бæрæггæнæн кæй райсдзæн, ууыл. Иттæг хорз ахуыр кодта. Бафтаудзыстæм ма уый, æмæ 43-æм скъолайы рауагъдонты бæрæггæнæнтæй ацы аз зæрдæ райы. Бирæтæ дзы фæлварæнтæй райстой 80 баллтæй фылдæр.
