Ног ахуыры аз студенттæн райдыдта райдзаст бæстыхайы. Цалдæр мæймæ агъуыстытæ сæ хуыз скалдтой. Дзæуджыхъæуы бирæпрофилон техникумы сног кодтой къулты ‘ссæрст, баивтой рудзгуытæ æмæ дуæрттæ, снывыл кодтой инженерон коммуникацитæ.
Техникумы бæстыхайæн ис культурон нысаниуæг. Бындур ын сæвæрдтой 1913 азы. Цалцæджы рæстæг къулы ‘ссæрсты бын ссардтой историон фыстытæ, кусæндоны администраци рахаста уынаффæ сæ бахъахъхъæныны фæдыл.
Рацарæзт æрмæст тыргътæ æмæ агъуыстытыл нæ фæзынд. Цалцæджы рæстæг ма саив кодтой фæсурокты ирхæфсæн бынæттæ дæр. Студенттæн сифтонг кодтой уæрæх кæсæн зал æмæ шахмæтты клуб.
Бирæпрофилон техникум сцалцæг кодтой национ проект “Фæсивæд æмæ сывæллæттæ”-йы фæлгæты. Хæстæгдæр рæстæг ам райдайдзæн рацарæзты дыккаг къæпхæн. Куыст сараздзысты афтæ, цæмæй ахуырадон процесс ма фæкъуылымпы уа.
