Царды дидинджытæ — сабитæ. Æнæхин, адджын æмæ хатгай тæлфаг. Республикæйы чысыл цæрджытæн Дзæуджыхъæуы сæйраг парчы бацæттæ кодтой тематикон æмæ спортивон фæзтæ. Иу цымыдисаг бынат иннæйы ивта. Чи сфæлдыстады йӕхи æвдыста, чи та фæлвæрдта æрмдæсныты æрмадзы хи арæхстджынæй равдисын. Бæрæгбоны фæдыл сабитæм саккаг кодта Сергей Меняйло дæр.
Ацы боны чысыл архайджытӕ уæлдай хъæлдзæг æмæ аив сты. Дыууæ æхсызгон цауы сын баиу сты. Цин кæнынц сæ бæрæгбон æмæ сæрды фыццаг боныл. Абон æппæт арфæтæ дæр сты сабиты номыл. Ирд æмæ цымыдисаг номыртæ республикæйы цæрджытæ æмæ уазджытæн бацæттæ кодтой сфæлдыстадон къордтæ дæр.
Æппæты фылдæр адæм фенæн уыд сценæмæ хæстæг. Юбилей дзы бæрæг кæнынц ирон композитортæ. Бæрæгбоны фæлгæты хатдзæгтæ скодтой зарæггæнджыты къордты конкурсæн дæр. Уæлахиздзауты схорзæх кодта республикæйы ахуырад æмæ наукæйы министр Алыбегты Эллæ.
Цалынмæ сабитæй иутæ сæ курдиат сценæйыл æргом кæнынц, уæдмæ иннæтæ та сæ арæхстдзинад æвдисынц æрмдæсныты æрмадзы. Архайынц хъæдæрмæгимæ, згъæрæй аразынц алыхуызон дзауматæ. Фæсивæдæн уæлдай цымыдисаг сты нæртон хъæзтытæ, суанг ма хъаматыл тох дæр самадтой. Сæ архайдмæ сын сæ хъус дарынц фæлтæрдджын специалисттæ.
Æрыгон уазджытæн бацæттæ кодтой тематикон фæзтæ дæр. Алы саби дæр дзы йæхицæн ссардта зæрдæмæдзæугæ куыст. Чи химион иртæстытæ кодта, чи зондабиты хъæзтыты хи фæлвæрдта. Уыимæ ма сæм æнхъæлмæ каст цымыдисаг æмæ æхсызгон фембæлд республикæйы сæргълæууæг Сергей Меняйло æмæ Дзæуджыхъæуы администрацийы сæргълæууæг Милдзыхты Вячеславимæ. Бабæрæг кодтой «Движение первых» фестиваль. Сывæллæттæ та æхсызгонæй уазджыты сбуц кодтой ирон музыкæйæ.
Фæсивæды змæлд «Движение Первых» ма сывæллæттæн фадат радта микрофонимæ азарын, æмдзæвгæ радзурын, арфæйы ныхæстæ зæгъын. Уыимæ ма сабиты зæрдæтæ балхæдтой сæлдæг æмæ аджын донæй. Мадзаларазджытæ бæрæгбоны фæлгæты байгом кодтой фестиваль. Ахæсдзæн июны кæронмæ. Цæгат Ирыстоны фæсивæдмæ æнхъæлмæ кæсынц алыхуызон мадзæлттæ.
Бæрæгбоны фæдыл арæзт мадзæлттæ цыдысты боны дæргъы. Изæры 8 сахатыл байгом уыдзæн сæрдыгон кинотеатр.