Цæгат Ирыстоны скъолаты байгом кæндзысты математикон æмæ кадетон кълæстæ. Ахæм хæс республикæйы ахуырад æмæ наукæйы министрады размæ сæвæрдта Сергей Меняйло. Ведомствæйы ацыд æмбырд. Профилон министры хæстæ рæстæгмæ æххæстгæнæг Алыбегты Эллæ фембæлд ахуырады управлени æмæ ахуырадон уагдæтты разамонджытимæ.
Ныхас цыд кълæсты ахуырадон модельтыл, пълæнттæ, стæй проекты методикон амынддзинæдтыл. Ныр уал проекттыл кусдзысты пилотон хуызы. Цæмæй сбæрæг уой райхалинаг фарстатæ æмæ хъæндзинæдтæ. Афтæмæй сыл уыдзæн дарддæр бакусыны фадат. Иннæ аз та профилон ахуырад цы скъолаты хъæуы, уым байгом кæндзысты кадетон æмæ математикон кълæстæ.
Алыбегты Эллæ куыд фæнысан кодта, афтæмæй хъуамæ алы сывæллоны бон дæр уа бæрзонд æмвæзадыл ахуырад райсын. Уымæ гæсгæ сын саразын хъæуы æмбæлгæ уавæртæ. Ныридæгæн уал сбæрæг кодтой 2021 азы сентябры проекты цы скъолатæ архайдзысты, уыдоны хыгъд. Министрады кусынц программæ æмæ методикон амынддзинæдтыл.
