Санитарон домæнтæ Горæтгæрон районы æхсæнадон бынæтты куыд æххæст кæнынц, уый сбæрæг кодтой Уæрæсейы фæлхасгæнджытæм цæстдарды управленийы æмæ гвардийы кусджытæ. Санитарон домæнтæй сæйрагдæр у маскæтæ дарын.
Уæрæсейы фæлхасгæнджытæм цæстдарды управленийы æмæ Уæрæсейы Гвардийы кусджытæ рацыдысты радон рейды. Ныртæккæ сæйраг нысан у, цæмæй коронавирус ма парахат кæна. Уый тыххæй та, æнæмæнг, æххæст кæнын хъæуы санитарон-эпидемиологон домæнтæ. Эксперттæ сбæрæг кодтой, Октябрскæйы дуканиты хæцгæ низæй хи бахъахъхъæныны мадзæлттæ куыд æххст кæнынц, уый.
Гасситы Нино – дуканийы администратор: «Антисептик нæм кæддæриддæр вæййы. Маскæтæ дарæм. Æрвылбон нæ буары тæвд дæр сбарæм, фæлæ йæ, раст зæгъгæйæ, журналы нæ фæнысан кæнæм. Æнхъæлдтам, æнæниздзинады домæнтæ æппæтдæр куы æххæст кæнæм, уæд йæ ныффыссын афтæ ахсджиаг нæу. Хъæндзинæдтæ æнæмæнг сраст кæндзыстæм».
Ахæм фæткхæлдыл сæмбæлæн ис республикæйы æхсæнадон бынæттæн сæ фылдæры. Уый фæдыл специалисттæ цæрджыты зæрдыл лæууын кæнынц, домæнтæ иууылдæр кæй хъæуы æххæст кæнын. Æрмæст уыдон сахаддзысты хуыздæрырдæм эпидемиологон уавæрыл.
Биазырты Дианæ – Уæрæсейы фæлхасгæнджытæм цæстдарды Цæгатирыстойнаг Управленийы барадон хайады сæйраг специалист: «Октябрскæйы дуканитыл æрзылдыстæм. Мæ бон зæгъын у, цæрджыты фылдæр хай уавæр æмбарынц, маскæтæ дарынц. Фæлæ фæткхæлдтытæ уæддæр ис. Уæлдæф сыгъдæггæнæн гæрзтæ алы ран не сты. Уæдæ кусджытæ дæр æнæмæнг хъуамæ æрвылбон сæ буары тæвд фæнысан кæной. Уый тыххæй ис сæрмагонд журнал».
Рейды архайджытæ цы аиппытæ рабæрæг кодтой, уыдон балæвæрдтой Мидхъуыддæгты министрадмæ. Фæткхалджыты бафхæрдзысты административон æгъдауæй.
Кокойты Светланæ – Уæрæсейы фæлхасгæнджытæм цæстдарды Цæгатирыстойнаг Управленийы горæгтæрон районы территориалон хайады сæйраг специалист: «Нæхæдæг дæр æрвылбон саразæм рейдтæ. Абон хъæндзинæдтæ цы дуканиты рабæрæг, уыдонмæ дæр нæ цæст дардзыстæм. Æппæт аиппытæ дæр иумæ аиуварс кæндзыстæм».
Куыд æгас Уæрæсейы, афтæ Цæгат Ирыстоны дæр дарддæр æххæст кæнын хъæуы маскæтæ дарыны фæтк. Уымæй уæлдай, республикæйы куыстуæттæ æдзух хъуамæ æххæст кæной санитарон-эпидемиологон домæнтæ. Ныртæккæ фæкарздæр сты æхсæнадон бынæтты æмæ транспорты. Цæмæй низ ма парахат кæна, уый тыххæй специалисттæ рейдты дарддæр цæудзысты.
Дзæдзойты Фатимæ
