Хабаровскы цæуы уæззау атлетикæйӕ Уæрæсейы чемпионат. Ирон спортсментæ дзы сæхи æвдисынц æнтыстджынæй. Афтæ, уæзы 76 килограммы онг категорийы фыццаг бынат бацахста Челæхсаты Мæдинæ. Æмткæй райсгæйæ, систа 216 килограммы. Уæлахиз ма йæ къухы бафтыд Соттиты Янæйæн дæр. Ирон спортсменкæ архайдта уæзы 81 килограммы онг категорийы. Æдæппæтæй систа 247 килограммы. Хорз цæттæдзинад равдыста æвддæсаздзыд Гуысæлты Зæринæ дæр. Спортсменкæйæн бантыст 226 килограммы сисын æмæ афтæмæй æвзист майдан рамбулын.
Бафтаудзыстæм ма уый, ӕмӕ æртæ спортсменкæйы дæр афæдзы дæргъы иттæг хорз бæрæггæнæнтæ кæй æвдисынц. Соттиты Янæ раззагдæр сси Уæрæсейы Кубок æмæ Цæгат Кавказы федералон зылды чемпионаты. Челæхсаты Мæдинæ та æрæджы сызгъæрин майдан райста Уæрæсейы чемпионаты. Уæдæ Гуысæлты Зæринæ та сызгъæрин майдан райста Уæрæсейы Кубокы.
