Фестиваль “Ирыстоны æвзонгдзинад” цæуы Цæгат Ирыстоны. Конкурсы архайджытæ се ‘сфæлдыстадон номыртæ æвдисынц музыкалон, кафæн, аивадон æмæ театралон здæхтыты: æдæппæтæй 17 номинацийы.
Абон 26 коллективы республикæйы алы районтæй равдыстой сæ хуыздæр эстрадон зарджытӕ æмæ адæмон кæфтытæ. Архайджыты кар у 10-æй 24 азы онг. Уæ зæрдыл уын æрлæууын кæндзыстæм, “Ирыстоны æвзонгдзинад” у “Уæрæсейы фæсивæды Дельфиаг хъæзтыты” республикон къæпхæн. Сæйраг нысан – æрыгон курдиæттæ ссарын æмæ сæ райрæзтмæ æвæрæн бахæссын. Фестивалы ирддæр равдыстытæ фенæн уыдзæн гала-концерты. Ацæудзæн Горæтгæрон районы культурæйы галуаны 15-æм декабры. Уæлахиздзауты хыгъдæй равзардзысты хуыздæрты. Уыдон иннæ аз апрелы Цæгат Ирыстоны номæй архайдзысты “Уæрæсейы фæсивæды 23-æм Дельфиаг хъæзтыты” Саранскы.
