Цæгат Кавказы аграрон-технологон колледжы хистæр кары адæм лæвæрдтой фæлварæнтæ. Цалдæр мæймæ цы ног зонындзинæдтæ райстой, уыдон абон сфæлхат кодтой сæрмагонд практикон фæлварæнты фæрцы. Цæгат Ирыстоны национ проекты фæлгæты цы сæрмагонд программæ ис, уый ныр цалдæр азы дæргъы æнтысджынæй кусы Цæгат Кавказы аграрон-технологон колледжы. Цы ахуыртæ дзы цæуынц, уыдон дзуапп дæттынц «Ворлдскиллс»-ы æппæтадæмон профессионалон стандарттæн.
Ацы ахуыргæнинæгтæ фыццаг хатт не ‘рбадтысты партæты уæлхъус. Ног зонындзинæдтæм тырнгæйæ, æрмæг теорийы хуызы нæ исынц, фæлæ ма сæхи фæлварынц практикæйы хуызы дæр. Пенсимæ чи нæма рацыд, уыдон сæхи фæлварынц алыхуызон дæсныйæдты.
Ныртæккæ Цæгат Кавказы аграрон-технологон колледжы хистæр кары адæм дæттынц фæлварæнтæ ног технологитимæ баст дæсныйадæй.
Уымæй уæдлай ма Цæгат Кавказы технологон колледжы фæлварæнтæ лæвæрдтой хъæдæрмæгимæ чи архайы, уыдон дæр.
Хъæдæрмæгимæ куыст æнцон нæу, зæгъы Цæгат Кавказы технологон колледжы ахуыргæнæг Къæбысты Лухум. Ацы хъуыддаджы сæйрагдæр у рæстæг. Ахуыргæнинæгты сæхиуыл хъæуы бакусын, цæмæй хъæугæ дзаума срæвдз кæной.
Национ проект «Демографи»-йы фæлгæты, федералон проект «Хистæр Фæлтæр» æмæ «Ворлдскиллс»-ы цæдисы руаджы хистæр кары адæм сæхи фæлварынц алыхуызон дæсныйæдты. Æрыдоны районы цæрджытæ ацы программæйы фыццаг хатт нæ архайынц. Ныр, цалдæр азы дæргъы Аграрон-технологон колледжы разамынды хъæппæрисæй, пенсимæ чи нæ ма рацыд, уыдон райстой ног дæсныйæдтæ, уыимæ ма сæ фæлтæрддзинад уæлдæр кæнынц.
Хуыйæг, электрик, хæринаггæнæг, хъæддæсны, æндадзæг æмæ ма æндæр дæсныйæдтæ. Ацы ахуыртæ сты лæвар. Ног зонындзинæдтæ æмæ дæсныйадмæ райсынмæ чи тырны, уыдонæн фадат ис проекты официалон сайтмæ бацæуын æмæ уым регистраци скæнын. Уый фæстæ та – ахуыртæм æрбацæуын.
Къутæрты Аидæ
