Цæгат Кавказы иннæ регионтимæ абаргæйæ, социалон ахадындзинад кæмæн ис, ахæм базайрæгтæ æппæты асламдæр сты Цæгат Ирыстоны

Социалон ахадындзинад кæмæн ис, ахæм базайрæгтæ æппæты асламдæр сты Цæгат Ирыстоны. Уый, Цæгат Кавказы иннæ регионтимæ абаргæйæ. Уый тыххæй фехъусын кодтой паддзахадон статистикæйы федералон управленийæ. Июны сбæрæг кодтой, Цæгат Кавказы федералон зылды субъектты цы æргътæ ис, уыдон. Зæгъæм, нæлхæйы рæстæмбис аргъ Цæгат Ирыстоны у 720 сомы иу килограммæн. Сыхаг республикæты та хæццæ кæны 900 соммæ. Æхсыр, сæкæр, цæхх æмæ уырыдзы дæр уæдæ махмæ у асламдæр. Экономикон рæзты министр Кучиты Зауыры ныхæстæм гæсгæ, æргъты рохтыл хæцын райдыдтой майы. Хæрдмæ сӕ хизын нæ уадзы, фарон регионалон базарадон центртæ бадзырд кæй бафыстой, уый дæр. Æххæст æй кæнынц абон бон дæр – æнæмæнг хъæугæ хойрæгты æргътыл не `фтауынц.