«Цъæх фæткъуы», зæгъгæ сфæлдыстадон фестиваль ацыд Цæгат Ирыстоны паддзахадон университеты. Мадзал аразджытæ – уæлдæр ахуыргæнæндоны администраци. Студенттæ бацæттæ кодтой музыкалон номыртæ. Фыццаг къæпхæны архайдтой университеты æппæт факультеттæ дæр. Хуыздæр номырты бахæсдзысты фестивалы юбилеймæ. Уæлахиздзаутæ архайдзысты фестивалы гала-концерты.
Ацы фестивальмæ фæсивæд сæхи бæстонæй цæттæ кодтой. Сахатгай репетицитæ. Æдзух бæстонæй архайдтой, цæмæй сæ равдыст рауайа иннæтæй аивдæр æмæ хуыздæр. Фестивалы райдайынмæ бирæ нал баззад, уæддæр ма чызджытæ сæхи рæсугъд кæнынц. Зæгъæм, мæнæ ацы чызджытæ педагогон факультеты ахуыр кæнынц. Ирон кафт кæндзысты. Хонгæйы мидæг кафæджы змæлд у тынг ахсджиаг, фæлæ ма чызджы рæсугъддзинаддæр дæр хъуамæ цæсты ахада.
Цалынмæ иутæ сæхи цæттæ кæныц сценæмæ рахизынмæ, уæдмæ иннæтæ фыццаг къухæмдзæгъд сæхи бакодтой. Фестивалы уазджытæ ма раст семæ зарын дæр райдыдтой.
Ацы кæфтытæ адæмы зæрдæты раджы сардтой бынат. Уазджытæн кафæджы змæлд сæ зæрдæмæ цæуы. Традицимæ гæсгæ кæнынц нырыккон кæфтытæ. Ома, дзы архайы бирæ адæм. Хореогрæф куыд зæгъы, афтæмæй ам æппæты зындæр у, цæмæй кафты архайджытæ иухуызон змæлой. Уый тыххæй та хъæуы бирæ ахуыр кæнын.
Æдæппæтæй фестивалы бацæттæ кодтой 20 номыры. Кæфтытæ, зарджытæ. Фестивальмæ кæсджытæн, алыхуызон номыртæ дзы кæй ис, уый сæ зæрдæмæ фæцыд. Æрвылаз сæ дисы бафтауынц фæсарæйнаг æвзæгтæ ахуыр кæныны факультеты студенттæ. Уыдон дзы бахæссынц цыдæр ногдзинæдтæ. Ацы фæсивæд иу æмæ дыууæ хатты университеты факультетты студентты `хсæн уæлахиздзаутæ нæ систы. Ацы хатт акодтой 2 зарæджы англисаг æвзагыл.
Цæгат Ирыстоны паддзахадон университеты сфæлдыстадон фестиваль ссис традицион. «Цъæх фæткъуы» аразынц 10-æм хатт. Æппæты хуыздæр номыртæ равдисдзысты гала-концерты. Кæд фæсивæды се ’ппæты дæр майдантæ æмæ кубоктæй не схорзæхджын кæндзысты, уæддæр сын мадзалы архайын тынг æхсызгон у. Фестивалы алы архайæгæн дæр ратдзысты цъæх фæткъуыты чыргъæд.
