Цæлыччы кадетон къласы ахуырдзаутæ алы хъуыддаджы дæр раззагдæртæ сты. Сæ боны фæтк бæлвырдгонд у. Сæ райсом райдайы физкультурæйæ. Урокы лæппутæ æмæ чызджытæн рæзы сæ физикон цæттæдзинад.
Фарон кадетты къорд “Орленок” фыццаг бынат бацахста æппæтуæрæсеон æфсæддон-патриотон ерысты Петербургы. Равдыстой иттæг хорз цæттæдзинад. Æнæмæнг, уый къухы бафтыд иузæрдиондзинад æмæ ахуыргæнджыты бæстон архайды фæрцы. Дарддæр кæстæртæ сæ арæхстдзинад равдисдзысты Хъырымы спортивон мадзалы.
Æрвылбон скъоладзаутæ архайынц уæлæмхасæн ахуырты. Се ‘хсæн æфсæддон-патриотон цæттæдзинад, хореографи, вокал, истори, сфæлдыстадон æрмадзтæ. Карсанты Регинæ хæцæнгарз райхалын æмæ сæмбырд кæнынмæ сæрæн у. Фыццæгты йæ ныфс нæ хаста, фæлæ ныр æфсæддон ахуырады уроктæ йæ уарзондæртæ сты.
Фæсивæды гæнæнтæ раргом кæнынæн хъæуы фæлтæрдджын разамонæг. Кадетон къласы раззагдæр хъомылгæнджытæй иу
у физкультурæ æмæ фæллойы ахуыргæнæг Дзгойты Дзамболат. Сывæллæттæн йæ тыхтæ æмæ рæстæг нæ æвгъау кæны. Алы ахуыргæнинагимæ дæр ын ис хорз ахастдзинæдтæ. Ахуыргæнæндоны 25 азмæ рауагъта бирæ хорз кæстæртæ. Свæййы сæ хæлар.
Ахуыргæнæджы дæсныйад равзардзæн уый æнхъæл Дзамболат никуы уыд. Бæллыд хуыйæг суæвынмæ. Райста сæрмагонд ахуырад дæр. Фæлæ афтæ рауад, æмæ йæ йæ фæндаг æрбакодта скъоламæ æмæ ам ссардта уарзон куыст.
Æмæ ууыл Дзамболат фæсмон нæ кæны. Йæ хъомылгæнинæгтимæ иумæ сæ рæстæг пайдаимæ æрвитынц. Зæгъæм, ныртæккæ æмбырд кæнынц бæстæйы картæ – стыр сахартæй чысыл горæтты онг. Уый æппæтуæрæсеон æркасты хæслæвæрдтæй иу у. Уæдæ ма лæппутимæ та фылдæр бафæстиат вæййы. Уыдон сæхи къухтæй хъæдæрмæгæй саразынц хæдзары хъæугæ дзауматæ.
Сывæллæтæн дæ рæстæг куы нæ æвгъау кæнай, уæд сæ миддуне хъæздыгдæр кæндзæн. Пайда сын уыдзæн фидæны. Дзгойты Дзамболат йæ æвæрæн хæссы рæзгæ фæлтæры раст хъомыладмæ. Сæ райсоммæ мæ сын куыд фæндыйы цæстæй нæ кæсы.
