Цæмæй сывæллæттæ худой

Дзæуджыхъæуы та райдыдта хæрзаудæн акци «Операция “улыбка”». Республикæмæ ссыдысты 30 фæлтæрдджын дохтыры. Се `хсæн – бритайнаг хирург Анкур Пандя æмæ анестезиолог Эстонийæ Максим Куневич. Бæрæг кæндзысты сывæллæтты æнæниздзинад æмæ, цы уавæры сты, уый. Ацы хатт фæнд кæнынц 60 операцийы скæнын. Рагагъоммæ сæм консультацитæм сæхи ныффыстой 100 сывæллоны. Хъыгдард сты сæ цæсгæмттæ æмæ се `фсæртæ, бирæтæн сæ буар у тынг сыгъд, сæ къæхтæ æмæ сæ къухтæ та – кæмæн даргъдæр, кæмæн та – цыбырдæр. Операцитæ сын кæндзысты сывæллæтты клиникон рынчындоны. Дохтыртæ фыццаджыдæр фæкæсдзысты, æвæстиатæй æххуыс кæй хъæуы, уыдонмæ, фæкæсынхъуаг æмæ бирæсывæллонджын бинонты кæстæртæн. Чи сæм æрхата, уыдонæй иунæг дæр æххуысцухæй нæ ныууаддзысты. Дохтыртæн рынчындоны кусынæн ис æппæт уавæртæ дæр. Зæгъдзыстæм ма уый, æмæ дохтыртæ операцитæ кæндзысты канд Цæгат Ирыстоны чысыл пациенттæн нæ, фæлæ Цæгат Кавказы æмæ Уæрæсейы иннæ регионтæй чи ссыд, уыдонæн дæр. Табуафси, саккаг сæм кæнут.