Æндæр хабæртты тыххæй. Дзæуджыхъæуы уыд имплантологты 18-æм Æппæтуæрæсеон Конгресс. Й` архайджытæ ныхас кодтой, дæндæгты низты куыд хуыздæр технологитæм гæсгæ ис дзæбæх кæнæн, уый тыххæй. Нæ бæстæйы фæлтæрдджындæр дохтыртæ ссыдысты Дзæуджыхъæумæ æмæ зонгæ кодтой сæ арæхстдзинæдтимæ.
Се `хсæн имплантологийы скъолайы разамонæг, Уæрæсейы наукæты академийы уæнг Сергей Иванов, ортопед-хирург Алексей Бунёв, профессор Юлия Семенова. Мадзалы архайджыты ныхæстæм гæсгæ, форумы базонæн ис нырыккон имплантологийы ногдзинæдтæ. Технологитæ ивынц алы аз дæр. Цæгат Ирыстоны медицинон академийы ректор Олег Ремизов куыд бафиппайдта, афтæмæй дæсны стоматологты æххуыс цыфæнды регионы дæр ахсджиаг фарста у. Цæгат Ирыстоны дæр кусынц ацы къабазы рæзтыл, цæмæй адæмæн уа хæрзхъæд медицинон лæггæдтæ. Фæлæ бирæ специалистты дæсныйад æмæ фæлтæрддзинад хуыздæрхъуаг сты. Зæрдæ дарæн ис, конгрессы архайджытимæ куыст сын кæй фæпайда уыдзæн æмæ дзы сæхицæн зонд кæй рахæсдзысты, ууыл.
