Ног бандæттæ – æвæрд, цъæх фæлыст – сагъд, рухсдæттæг системæ – арæзт. Уæдæ ног асфальт дæр цæхæртæ калы. Алагиры, парти «Иугонд Уæрæсе»-йы проект «Городская среда»-мæ гæсгæ базылдысты дыууæ фæлладуадзæн бынатмæ – Каштанты аллея æмæ парчы хаймæ. Уыцы хæрдзтæн федералон æмæ регионалон бюджеттæй радих кодтой 7 милуан сомы. Не сфæлдыстадон къорд араст Алагирмæ æмæ федта, куыд барæсугъд горæт, уый.
Алагиры цæрджытæ бирæ уарзынц изæрыгон æдтæмæ рацæуын æмæ рæсугъд бынаты сыгъдæг уæлдæфæй аулæфын. Ныр та уæлдайдæр. Горæты саив кодтой дыууæ æхсæнадон бынаты – аллея æмæ парчы иу хай. Адæм базилинаг бынæттæ равзæрстой сæхæдæг. Мадзæлттæ арæзт цæуынц программæ «Городская среда»-йы фæлгæты. Бирæ фенхъæлмæ кастысты цæрджытæ ацы хъуыддагмæ, ныр йæ хатдзæгтæй разы сты.
Ленины уынджы аллея рагæйдæр адæмæн уыд сæ уарзондæр фæлладуадзæн бынат. Куыд æй срæсугъд кодтой, уый сеппæты зæрдæмæ дæр тынг фæцыд. Ныр уазджыты ардæм ракæнæн дæр ис. Зæрдæ парчы уындæй дæр райы. Алагир проекты фыццаг хатт нæ архайы. Фарон парти «Иугонд Уæрæсе»-йы æххуысæй горæты астæу сцалцæг кодтой бирæфатерон хæдзæрттæ æмæ Хетæгкаты Къостайы номыл уынджы хай. Парти ууыл сæ куыст нæ бауромдзысты.
«Иннæ аз базилдзыстæм æндæр бæстыхæйттæм. Адæм та хъæлæс кæндзысты æмæ равзардзысты, базилын цы бынæттæм хъæуы фыццаджыдæр, уыдон. Æмæ та сæ партийы проектмæ гæсгæ сцалцæг кæндзыстæм», — Алагиры районы парти «Иугонд Уæрæсе»-йы разамонæг Уртаты Хъазыбег.
Алагиры аллея фæрæсугъд ис, фæлæ йæ æнæхъæнæй нæ саив кодтой нырма. Зæрдæ бавæрдтой, куыст кæронмæ кæй ахæццæ кæндзысты. Раст зæгъгæйæ, кæд, уый нырма бæрæг нæма у.
Биджелты Бертæ
