Беслæны 8-æм скъолайы ахуырдзаутæн абон сарæзтой æцæгæйдæр цымыдисаг урок. Хъæддаг æрдзы Æппæтдунеон фонды минæвар, телеуынады хабæртты зындгонд амонæг Екатерина Андреева саккаг кодта Цæгат Ирыстонмæ. Скъоладзаутæн бакатс лекци. Цæмæ хъæуы фыранкты Кавказы хъæды бахъахъхъæнын æмæ сæ куыдæй ис сбирæ кæнæн? Кадджын уазæгмæ цымыдисæй хъуыстой не сфæлдыстадон къорды уæнгтæ дæр.
Беслæны 8 скъолайы ахуырдзаутæ ацы хатт уæлдай цингæнгæ æрбацыдысты. Фыццаг дзæнгæрæгимæ сæм æнхъæлмæ каст телеуынады зындгонд амонæг Екатерина Андреева. У хъæддаг æрдзы Æппæтдунеон фонды минæвар. Уымæн йæ сæйраг нысан у фыранкты Кавказы хъæды сбирæ кæнын. Екатерина Андреева сывæллæттæн бакаст, цæрæгойты куыд бахъахъхъæнæн ис, уый фæдыл цымыдисаг лекцитæ. Йæ ныхæстæм гæсгæ, ацы хъуыддагыл æнæмæнг хъæуы сывæллæтимæ дзурын.
Екатерина Андреева, хъæддаг æрдзы Æппæтдунеон фонды минæвар, телеуынады хабæртты зындгонд амонæг: «Сывæллæттæ нæ фидæн сты. Ацы программæйы рæзты тыххæй уыдонимæ хъæуы кусын. Адæмы сыхæгтæ ныр сты фыранктæ. Хъыгагæн, ивгъуыд рæстæджы Цæгат Ирыстоны цæрджытæ ацы сырдты скуынæг кодтой. Уымæ гæсгæ сывæллæттимæ хъæуы хъомыладон куыст кæнын. Уыдон хъуамæ æмбарой, фыранктæн сафæн кæй нæй, уый».
Скъоладзаутæ цымыдисæй хъуыстой. Бирæтæ сæ фыццаг хатт базонгæ сты фыранкты сбирæ кæныны программæимæ. Уæлдай æхсызгон сын уыд, Екатерина Андреееваимæ кæй базонгæ сты, уый. Мадзал аразджытæ сывæллæттæн равдыстой видеоæрмæджытæ, хуызистытæ. Зындгонд амонæг сын бацамыдта, фыранкимæ фембæлгæйæ хи куыд дарын хъæуы, уыдæттимæ. Сывæллæттæн лекци рауад тынг цымыдисаг.
Ацы программæ æххæст кæнынц цалдæр азы. Проектыл кусынц, хъуыддагмæ куыдфæндыйы цæстæй чи нæ кæсы, уыдон. Азæй-азмæ архайджыты нымæц фылдæр кæны. Екатерина Андреева уыйразмæ бабæрæг кодта Краснодары край æмæ Кавказы фæдзæхст ран. Проект парахатдæр кæны. Куыд рабæрæг, афтæмæй у цымыдисаг æмæ хъæугæ. Сывæллæттæ зындгонд амонæджы фæрстыты бын фæкодтой. Хæдтæхæгмæ куы нæ тагъд кодтаид, уæд æй изæрмæ дæр нæ ауагътаиккой. Фæлæ сын дзырд радта, Ирыстонмæ та кæй ссæудзæн, уымæй.
Уазиты Зæлинæ
