Турчы ирон диаспорæ баххуыс кодта Цæгат Ирыстоны медицинон кусджытæн: 4 мины бæрц костюмтæ, 3 мины – медицинон æмæ 10 мины – бирæ хатт кæмæй спайдагæнæн ис, ахæм маскæтæ. Цалдæр боны размæ æххуыс рарвыстой Стамбулæй. Тагъд æххуысы клиникон рынчындоны сæйраг дохтыр Хъаныхъуаты Сергейы ныхæстæм гæсгæ, хи бахъахъхъæнынæн фæрæзтæ сфаг уыдзысты æртæ къуырийæн.
Уæ зæрдыл уын æрлæууын кæндзыстæм, æххуыс рарвыста не `мзæххон, Турчы хъуыстгонд амалхъом адæймаг Хъаныхъуаты Шериф.
Эпидемиологон уавæры тыххæй ацы хъуыддаг сæххæст кæнын æнцон нæ уыд. Уымæй уæлдай ма Турчы цы закъон æвæрд ис, уымæ гæсгæ Туркæй медицинон дзауматæ ласæн у зынвадат. Диаспорæйы уæнгтæн æмæ профилон кусджытæн ацы фарста райхалын сæ къухы бафтыд. Дзæуджыхъæуы Таможнæйы посты разамонæг, Баситы Асланы ныхæстæм гæсгæ медицинон æххуыс суæгъд кодтой æнæмæнг фиддонæй æмæ æфтыд аргъы хъалонæй.
