Цæгат Ирыстоны хицауады сæрдар радон хатт бæрæг кæны, республикæйы социалон æгъдауæй ахсджиаг чи сты, уыцы объекттæ.
Пъланмæ гæсгæ, йæ балц райдыдта Дзæуджыхъæуæй. Цæгат Ирыстоны федералон инспектор Челæхсаты Владимиримæ федта Этнотуризмы центр «Фарн»-ы арæзтад. Бæстыхай фæццæтæ кæнынц, хъуамæ йæ байгом кæной иннæ къуыри. Куыстытæ куыд æххæст кæнынц, уымæй Тускъаты Тамураз разыйæ баззад.
Иннæ ахсджиаг объект – Сывæллæтты театр «Саби». Цалцæггæнæн куыстытæ дзы сæ тæмæны сты. Куы сцæттæ уа, уæд дзы уыдзæн 200 бынатæй фылæр. Бæстыхайы иумæйаг фæзуат – 1700 квадратон метры. Театр йæ дуæрттæ байгон кæндзæн 1-æм ноябры. Хицауады сæрдар сбæрæг кодта Сывæллæтты республикон клиникон рынчындоны цалцæг дæр. Уыимæ ма дзы аразынц поликлиникæ.
