Хицауады сæрдары хæстæ рæстæгмæ æххæстгæнæг Тускъаты Таймураз фембæлд Рахизфарсы районы бынæттон хиуынаффæйады минæвæрттимæ. Дзырдтой районы ахсджиагдæр фарстатыл. Бæрнон кусджытæ се ’ргом аздæхтой, нацпроекттæ æмæ паддзахадон программæтæ бынæттон хицауад куыд æххæст кæны, уымæ. «Кæлæтдзаг хæдзæрттæй ногтæм раивыны» программæйы фæлгæты районы хъæуты æмæ Беслæны аразынц ног бирæфатерон хæдзæрттæ, амбулаторитæ æмæ рæвдауæндæттæ. Уымæй уæлдай дзы фæзындзæн культурæ, спорт æмæ æнæниздзинад хъахъхъæныны 13 ног объекты. Æнтыстджынæй районы æххæст кæнынц «Формирование комфортной городской среды» федералон проект.
Æмбырды дзырдтой цæрæнуæтты-коммуналон хæдзарады риссагдæр фарстатыл. Бирæ азты нуазыны донимæ къуылымпыдзинæдтæ уыд Брут, Ног Бæтæхъо, Хуымæллæг, Заманхъул, Раздзог, Цæлык æмæ Зильгæйы хъæуты. Паддзахадон программæты фæлгæты объектты арæзтадмæ хъæуы уæлдай æргом здахын – фæнысан кодта премьер. Абоны бонмæ уал Рахизфарсы районы цалцæггонд цæуынц ахуырадон уагдæттæ æмæ 18 спортивон залы. Æппæт объекттæ дæр хъуамæ цæттæ уой ног ахуыры азы райдианмæ.
