Тускъаты Таймуразы разамындæй арæзт æрцыд Парламенты æмбырд

Парламенты депутат Дыдарты Сослан бахаста хъæппæрис таксийы лæггæдты бынæттон сервис скæнын. Куыд фæнысан кодта, афтæмæй цæрджытæ хъаст кæнынц, æвзæр боныхъæды заказы аргъ 500 сомæй кæй ахизы. Адæмæн хъæуы æмбæлгæ уавæртæ скæнын, цæмæй сæ бон лæггæдтæ æххæстгæнджыты æвзарын уа. Дзуапдæттæг комитеты сæрдар Солиты Тариэлы ныхæстæм гæсгæ, фарстайыл ныридæгæн куыст цæуы. Парламенты æмбырды ма æрныхас кодтой иу риссаг фарстайыл. Муниципалитетты ‘хсæн æхсæнадон транспорты тарифты аргъ. Бæлццæттæ цæттæ сты фылдæр фидын, æрмæст лæггæдты хæрзхъæддзинад хуыздæр цух у. Сæвзæрд уавæры тыххæй Солиты Тариэл радта дзуапп, зæгъгæ, фæзынаргъ сты артаджы æмæ хæдтулгæты хæйттæ. Бæлццæттæ ласджытæн сæхицæн зиан хæсгæйæ кусын сæ бон нæу. Парламенты уæнгтæ фыццаг æркасты рахæцыдысты хæстæгдæр æртæ азмæ республикон бюджеты закъоныпроекты фарс. Скъолайы æмæ спортивон формæ балхæныны тыххæй æрвылазон фиддон, гæнæн ис, æмæ снысан кæной иннæ азæй. Исдзысты йæ æххуысцух æмæ бирæсывæллонджын бинонтæ. Ацы нысантæн фæнд кæнынц 168 милуан сомы радих кæнын. Спикер Тускъаты Таймураз фæнысан кодта, хи хъалонты æфтиæгтæ фылдæр кæнын у ахсджиаг, уыимæ ма хъæуы экономикæйы æппæт къабæзты бæстон анализ кæнын. Уый ‘руаджы иртасдзысты райрæзты æууæлтæ.