Дигорайы нырыккон æмæ æппæтæй æххæст спортивон комплекс. Кусы дзы 7 секцийы. 800 адæймагæй фылдæр бынаты архайынц хъæбысхæстæй, волейболæй, гимнастикæйæ æмæ уæззау атлетикæйæ. Æвзонг Аня парламентаритæн æвдисы йæ арæхстдзинадд штангæимæ.
Комплекс байгом 7 азы размæ. Уыцы æмгъуыдмæ дзы схъомыл кодтой дæсгай ерысты чемпионты. Æмæ уый диссаг нæу, уымæн æмæ сæ тренертæ сты профессионалон спортсментæ. Уæвгæ та, ахæм уавæртимæ æнтыстдзинæдтæм тырнын æхсызгон у.
Ам егъау турниртæ скæнынц æппæт дисциплинæтæй. Тускъаты Таймураз бабæрæг кодта ахуыртæ. Спикеры бæстондæр базонын бафæндыд æвзонг футболистты цæттæдзинадмæ.
Дзырдæн, районы разамынд канд спорты рæзтмæ не здахы йе ргом. Ахсджиаг бынаты ис хъæууон хæдзарады къабаз. Депутаттæ дарддæр цы объект бабæрæг кодтой, уый та ирд æвдисæн у паддзахадон æххуысы мадзæлттæ куыд æххæстгонд цæуынц, уымæн. Адджын гагадыргъты цыппар гектары. Æрмæст августы райдианæй ам æрæмбырд кодтой мæнæргъыйы 2 мин тоннæйæ фылдæр. Голубикæйы фыццаг тыллæгмæ та æнхъæлмæ кæсынц фидæны аз. Талатæ садзын райдыдтой фарон уалдзæджы. Уæдаты Мæирбег спайда кодта хъæууон хæдзарады министрады грантæй 12 млн соммæ ‘ввахсæн. Ноджы ма иу уый бæрц амалхъом райсдзæн ацы аз. Ам ма фæнд кæнынц фæткъуы æмæ бал зайын кæнын. Уыимæ ног хуызмæ гæсгæ.
Паддзахадон æххуыс æмæ æмткæй бизнесы парахат кæныныл Парламенты спикер дзырдта районы амалхъом адæмимæ. Сæйраг темæтæй иу сси боныхъæды уавæртæ. Фæстаг цалдæр азы фермертæ бирæ тыллæг сафынц хусрæстæджы аххосæй. Фæнысан кодтой астæуккаг æмæ чысыл амалхъомады æндæр фарстатæ дæр.
Парламенты советы æмбырды бæстон ныхас цыд районы социалон-экономикон райрæзтыл. Ивгъуыд аз Дигорайы кæронмæ æрхæццæ дондзæуæн хызæгты рацарæзт, сарæзтой дзы сквер æмæ культурон райрæзты центр. Ныртæккæ дзы бындуронæй цалцæг кæнынц сывæллæтты рæвдауæндон, Дур-Дуры та скъола. Куыстытæ фæуынвæнд кæнынц ацы азы кæронмæ. Сног кæнынмæ хъæуы къорд ахуырадон кусæндæттæ. Тускъаты Таймураз бахæс кодта мониторинг скæнын æмæ раиртасын цалцæггæнинаг объекттæ.
Депутатты размæ ма ноджы иу хæс – æппæт æнæзакъон бырондæттæ аиуварс кæнын. Ныртæккæ районы ахæм бынæттæ бирæ ис. Парламенты уæнгтæ ма се ‘ргом аздæхтой сидзæр æмæ æнæ ныййарджыты æвджид чи баззад, уыдонмæ. Уæлдайдæр та сын сæ бартæм цæрæн бынат райсыны фæдыл. Абон ахæм гæнæн ис 133 адæймагæн. Раст зæгъгæйæ, ацы къабазы архайд сабыргай цæуы. Ивгъуыд аз ахæм барæй спайда кодта æрмæст районы иу цæрæг.
Парламенты советы æмбырд алы районы дæр ацæуы æппынкъаддæр афæдз иу хатт. Ахæм хуызы архайд сси традицион, æмткæй пайда у алы къабазы райрæзтæн дæр. Уымæн æмæ бынаты раиртасæн æмæ аиуварс кæнæн ис алыхуызон фарстатæ.
