Уæрæсейы парахат кæны мæргъты грипп

Уæрæсейы парахат кæны мæргъты грипп. Ныртæккæ æнæмæнг у низ ма ‘руадзыны мадзæлттæ æххæст кæнын. Биологон æдасдзинады фарстатыл æрдзырдтой Цæгат Ирыстоны Хъæууон хæдзарады министрады. Маргътæдарæн хæдзарæдты хицæуттæн ма иу хатт сæ зæрдыл æрлæууын кодтой, низ ма ‘руадзын йе ‘сдзæбæх кæнынæй æнцондæр кæй у, уый. Республикæйы Ветеринарийы управленийы разамонæг Кокуаты Сослан куыд фехъусын кодта, афтæмæй фарон бæстæйы рабæрæг мæргъты гриппы 74 цауы, ацы аз – 3. Уыдонæй иу – Белгороды, дыууæ – Воронежы облæсты. Вирус парахат кæнынц хъæддаг æмæ фæлтæхæг мæргътæ. Арæхдæр бахæцы хæдзарон кæрчытæ, бабызтæ æмæ хъазтыл. Æмбырды фæбæрæг кодтой, ветеринарон домæнтæ æххæстгæнгæйæ, уавæр бирæ хуыздæр уаид. Регионы цы мæргътæ ис, уыдон сты 600 минæй фылдæр. Уыдонæй хи хæдзарæдты – 280 мины. Æхсæнадон секторы та сты 335 минмæ хæстæг. Клиникон æркаст сын кæнынц æппынæдзух. Уæдæ маргъдарыны продукцимæ дæр цæстдард ис. Нæ базарты тæрхæдджытæм бахауынц, æрмæст ветеринарон документтæ кæмæн ис, ахæм æйчытæ æмæ дзидза.