Уæрæсейы равзардзысты хуыздæр разамонæджы

Цæгат Кавказы Федералон зылды Æппæтуæрæсеон разамонджыты конкурс “Уæрæсейы раздзог, зæгъгæ, уым, сбæлвырд кодтой æрдæгфиналы хатдзæгтæ. Цæгат Ирыстонæй дзы 5 адæймаджы схызтысты уæлдæр къæпхæнмæ. Фæлтæрæн арæзт æрцыд Пятигорскы ацы мæйы райдианы. Уæлахиздзаутæ суæвыныл дзы ерыс кодтой 20 адæймаджы. Финал та ацæудзæн февралы Мæскуыйы. Цæгат Кавказæй дзы архайдзысты 30 адæймаджы – нæ республикæйы минæвæрттæй уæлдай ма 19 разамонæджы Стъараполы крайæ, 3 – Дагестанæй, 2 адæймаджы – Кæсæг-Балхъарæй, иу та – Цæцæны Республикæйæ. Æдæппæтæй курдиæттæ балæвæрдтой æртæсæдæ адæймаджы æппæт Уæрæсейæ. Кæронбæттæн фæлварæнты уæлдай ма сын сараздзысты конференци. Базонгæ сæ кæндзысты алыхуызон ахуыртимæ, разамынды æппæт дунейы цы ногдзинæдтæ ис, уыдонимæ. Интеллектуалон ерысы сæйраг нысан у ног фæлтæры æппæты хуыздæр разамонæджы базонын. Конкурсы хатдзæгтæм гæсгæ æртæсæдæ финалисты райсдзысты грантытæ дарддæры ахуырæн. Йæ бæрц у 1 милуан сомы.