Ирыстоны дохтыртæ фылдæр кæнынц сæ фæлтæрддзинад. Сæ ныфс хæссынц, Уæрæсейы бирæ дзæбæхгæнæндæтты цы нæма кæнынц, ахæм операцитæм. Æмæ сын æнтысгæ дæр кæны! Æвзыгъд специалисттæ дыууæ сахатмæ сæ къæхтыл слæууын кæнынц, бирæ азтæ сæ астæустджыты низæй йæ бон цæуын кæмæн нал вæййы, уыдоны.
Цавæр мадзæлттæй пайда кæнынц Авиценнæйы фæдонтæ, æмæ ма нын цы ногдзинæдтæ равдисдзысты? Уый зонынц не сфæлдыстадон къорды уæнгтæ.
Уæззау операци, дыууæ боны реабилитацигæнæн мадзæлттæ, æмæ рынчын йæ къæхтыл слæууыди. Нырма уал Хуыгаты Нугзар къахдзæфтæ хъавгæйæ кæны, фæлæ йæхи æнкъары бирæ хуыздæр.
Мæ астæуыхъæд рагæй рысти. 7- 8 азы тухæнтæ фæкодтон. Ныббыхсæн ын зынтæй уыди. Ныр мæ зæрдæ дарын, æмæ ма мæ дохтыримæ футболæй дæр кæй ахъаздзынæн.
Æрæджыдæр ма бауырнинаг цы нæ уыди, ныр уыцы хабæрттæ æрцыдысты. Нырыккон кусæнгæрзтæй архайыны тыххæй ирыстойнаг дохтыртæ Уæрæсейы клиникæты ацыдысты сæрмагонд ахуыртæ. Дзырдæн зæгъæм, чысыл имплантант “кейдж” бавæрынц рынчыны астæухъæды стджыты `хсæн. Кæд раздæр ахæм операци скæныны тыххæй дохтырты рынчыны синты стæгæй ралыг кæнын хъуыди, уæд ныр уыцы стæг ивынц имплантантæй, æмæ адæймаджы дыууæ хатты лыг кæнын нал бахъæуы. Ирыстоны ахæм ног хуызы операцитæ скодтой 100-йæ фылдæр. Се `ппæт дæр рауадысты æнтыстджын.
Ног азы фæстæ нæ республикæйы кæнын райдайдзысты лазерон операцитæ. операцитæ цæудзысты 10- 15 минуты. Райсын дзы хъæудзæн квотæтæ.
Йæ астæуыхъæды низæй чи сæйы, уыдоны дзæбæх кæндзысты квотæтæм гæсгæ. Дæттынц сæ æнæниздзинадхъахъхъæнынады министрады. Дохтыртæ куыд зæгъынц, афтæмæй рынчыны сдзæбæх кæныны хъуыддаджы сæйрагдæр у низ афойнадыл раиртасын. Уый дзы куы нæ уа, уæд адæймагæн цыфæнды ног технологитæ дæр зынтæй баххуыс кæндзысты.
