Абон Цæгат Ирыстоны мысынц Суанты Кимы. Уæрæсейы сгуыхт артист, Цæгат Ирыстоны адæмон артистыл хъуамæ сæххæст уыдаид 80 азы. Стыр курдиаты хицау. Йæ номимæ баст у ирон эстрадæйы историйы ног дуг. Зарæггæнæджы репертуары уыд æрмæст классикон уацмыстæ нæ, фæлæ дунейы зындгонд зарджытæ дæр. Уæддæр ын уæлдай зынаргъ уыдысты ирон æвзагыл фыст зарджытæ. Суанты Кимы цард æвирхъауæй аскъуыд 25 азы размæ, фæлæ йæ сфæлдыстад абон дæр ма цæры. Йæ зарджытæ йын уарзынц æмæ зарынц. Æрымысыдысты йæ Тæбæхсæуты Балойы номыл ирон академион театры. «Ирыстоны сыгъзæрин хъæлæсы» номыл сарæзтой концерт. Бæлвырддæр радзурдзæн Хъараты Маринæ.
Ирыстонæн стыр хæрзты чи бацыд, ирон аивады йæ тæмæнтæ калгæ курдиатæй йæхицæн стыр ном чи скодта, уыдоны æмрæнхъ уæндон къахдзæфтæй цыд Уæрæсейы Федерацийы сгуыхт артист, Цæгат Ирыстоны адæмон артист Суанты Ким.
Ирон аивады сыгъзæрин хъæлæс, Суанты Ким æвирхъауæй фæмард 25 азы размæ. Ирыстоны фыццаг эстрадон зарæггæнæг Суанты Ким аивадуарзджытæн балæвар кодта æнæхъæн музыкалон дуг. Цы зарджытæ акодта, уыдон абон нымад сты эстрадон жанры классикæйыл.
Суанты Кимы адæм уарзтой, канд йæ курдиаты тыххæй нæ, фæлæ ма зæрдæхæлар, хуымæтæг, хъæлдзæг адæймаг кæй уыд, уый тыххæй. Йæ руаджы республикæйы фæзынд Национ эстрадон оркестр æмæ ныр хæссы Суанты Кимы ном. Ацы аз оркестрыл сæххæст 20 азы.
