Ушаковы æмæ Морозовы номыл уынгты тигъыл хæдзæртты цæрджытæ сæ уавæрæй тыхсынц. Сæ рацæуæнтæ быроны бын фæвæййынц. Æвзæр тæф уæлдæфы лӕууы. Адæм бырондоны тыххæй фыццаг аз нæ хъаст кæнынц. Кæд хауæддзæгтæ фæткмæ гæсгæ æрвылбон раласынц, уæддæр ногæй-ногмæ февзæрынц быроны обæуттæ. Цæрджытæ сæ фарста аиуварс кæныны фæдыл къахихсыд баисты дзуапдæттæг ведомствотæм цæугæйæ, фæлæ сын уæддæр дзуапдæттæг нæй.
Стæй ма арæзтадон бырон, хъабых къоппытæ, хæдтулгæйы хæйттæ æмæ ма суанг, хæстæг цы æргæвдæн ис, уырдыгæй фосы стджытæ. Ахæм æлгъаг фæлгонц ныр æртæ азы дæргъы ис Ушаковы æмæ Морозовы уынгты тигъыл.
Ам уыры кæнæ дзæгъæл куыйты æрдонгыл ма фембæлай, уый гæнæн нæй. Дымгæ та бырӕттӕ æгас сыхыл ныпырх кæны. Ныртæккæ, кæд тæвд нал у, уæддæр адæм æвзæр тæфæй хуыдуг кæнынц. Сæрдыгон та бырондонæн йе ‘мгæрæтты ацӕуӕн дæр нæй.
Æххуысы фæдыл цæрджытæ иу æмæ дыууæ хатты нæ бахатыдысты горæты администрацимæ. Куы фыстæджытæ фыстой, куы къухфыстытæ æмбырд кодтой. Уавæр та куыд уыд, афтæ йӕ бынатӕй не змӕлы.
Регоператор “Эра”-йы кусджыты ныхæстæм гæсгæ, бырон ардыгæй ласт цæуы къуыри цалдæр хатты. Сæ хæс у — æрмæст цардыуаджы хауæццæгтæ ласын. Фæлæ уæддæр æппæт бырӕттӕ дæр аласынц, науæд ам бирæ стырдæр бырондон сæвзæрдаид.
Бырондон иуæрдыгæй, иннæрдыгæй — фæндæгтæ. Афӕдзгӕйтты сæм зылд нæ уыд. Асфальт гæбазгай баци æмæ дзыхъхъыты, къæвдайы фæстæ цы култæ сæвзæры, уыдон иуцасдæр рæстæг нал бахус вæййынц. Адæм бафæлладысты, фæлæ уæддæр зæрдæ дарынц, кæд сæм, мыййаг, исчи йе ‘ргом раздахид.
