Дымын æмæ фæздæг калын, дам, иу нæу. Афтæ ныр арæх фехъусын ис горæты уынгты. Адæймаг фæздæг калгæ куы фæцæйцæуа, уæд иу æй паровоз ма фенхъæлут! Уыдон сæхи вейпертæ хонынц. Ахæм англисаг дзырд нæм ног электрон тамакотимæ ‘рбафтыд. Адæймаджы æнæниздзинадыл куыд фæзынынц, ууыл нырма быцæутæ цæуы. Фæлæ сæ сывæллæттæн уæй кæнын æмæ сæ æхсæнадон рæтты дымын, депутаттæм раст нæ кæсы. Уый тыххæй ныффыстой ног закъоны проект. Цæй тыххæй у закъон æмæ цы сты уыцы «вейптæ» базыдтой нæ уасхæсджыты къорд.
Вейпертæ фæзæгъынц, мах дымгæ нæ кæнæм, фæлæ фæздæг уадзæм. Кæд вейптæ кæдон хуыйнынц, уыцы дымæн аппараттæй нырма æрæджы райдыдтой пайда кæнын Ирыстоны, уæддæр тынг апарахат сты фæсивæды ‘хсæн. Иуæй иутæ се ‘руаджы æхсæнадон бынæтты дымын цы закъон нæ уадзы, уый афæливынц. Аппараттæ фенæн ис скъладзаутæм дæр. Закъонмæ гæсгæ вейптæ сывæллæттæн ауæй кæнын иваргонд нæу. Электрон тамако у ингаляторы хуызæн. Ис ын аккумулятор, платæ æмæ бак. Аккумулятор тынгад дæтты хæтæлмæ, уый та куы стæвд вæййы, уæд дзы цы донгъæд вæййы, уый сысын райдайы. Фæздæг та англисагау у «вейп». Электрон дымынады сæр чи хæцы, уыдоны хъуыдымæ гæсгæ, приборты сæйраг хæс у æнæуый тамакойау зиан чи нæ хæссы, ахæмтæй баивын. Æцæгæйдæр æнæниздзинадæн æвзæр у æви нæ, уый нырма гом фарста у. уæрæсейаг эксперттæ тæрхон нæма рахастой. Фæлæ уæйгæнджыты ныхæстæм гæсгæ, тамако æвзæрдæр у вейпæй. Кæд электрон у, уæддæр тамако у. Уæрæсейаг депутатты фæнды вейптæ тамакоты æмрæнхъ сæвæрын æмæ сæ æхсæнадон бынаты пайда кæнын мауал уадзын.
Вейпты тыххæй иу хъуыдымæ æрцæуын дохтыртæн дæр сæ бон нæу. Иутæ зæгъынц – асайынц мæлæтмæ, иннæтæ та – стыр сахары улæфынæй фылдæр зиан нæ хæссынц. Цалынмæ иртасæн куыстытæ кæнынц, уæдмæ дохтыртæ сидынц, ног прибортæм ма бæллын æмæ æнæниздзинад хъахъхъæнын.
Кæд вейпты рæзтмæ нæ чысыл республикæ цæттæ нæ уыд, уæд кальянтимæ тох кæнын раджы райдыдта. Уыдоны тыххæй ныхас цæуы ног закъоны проекты. Фаронæй нырмæ бирæ кафетæ барвæндонæй кальянтæ нал уæй кæнынц. Экспертты ныхæстæм гæсгæ, уый хуымæтæджы нæу, уымæн æмæ кальяны цы уæззау металлтæ ис, уыдон адæймаджы æнæниздзинадæн стыр зиан хæссынц. Закъоныл куы схъæлæс кæной, уæд 18 азæй къаддæр кæуыл цæуы, уыдонæн электрон тамакотæ æлхæныны бар нал уыдзæн. Уымæй уæлдай ма сæ æхсæнадон бынæтты дæр дымын нал уаддзысты. Ног закъон йæ тыхы бацæудзæн инæ азы 1-æм январы.
