Уаты цырагъ кӕд судзы, уӕддӕр рухс афтӕ лӕмӕгъ у, ӕмӕ дзы рухсдарæй пайда кӕнын хъӕуы. Изӕрыгӕтты ахӕм уавæр вæййы Заводы поселочы Къудухты Бесикы уынджы ӕппӕт хӕдзӕртты дӕр. Фӕлӕ хъуыддаг ӕрмӕст мынӕг рухсыл нӕу. Адӕмӕн сӕ хæдзарон техникæ нал бӕззы.
Æппæт дæр, токы тынгад иудадзыг иухуызон кæй нæу, уый тыххæй. Кӕй зӕгъын ӕй хъӕуы, ӕххуыс сты стабилизатортӕ. Фӕлӕ алкæмæ не сты, стæй уыдон дӕр асæттынц.Бӕрӕггӕнӕнтӕ æрхауынц 120-150 вольты онг ӕмӕ схизынц 280-мæ, нормæ та у 210-230 вольты. Видеойы зыны тынг ныллӕг нысаниуӕг — 105 вольты. Уый электрон гæрзтæ халгæ кæны ӕмӕ та адӕм сæ дзыппытæ, ногтæ æлхæнгæйæ, раафтид кæнынц. Фарста рагон у, 90-æм азтӕй фӕстӕмӕ, уынджы хæдзæрттæ аразын куы райдыдтой, уӕдӕй.Цӕрджыты тыхст уавӕр хибарӕй алыг кӕнæн нæй. Фӕстаг 5 азы сидынц алыхуызон инстанцитӕм.
Фарон уалдзӕджы та цӕрджытӕ курдиат ныффыстой республикӕйы сӕргълӕууӕгмӕ, ӕмӕ уый æрвыст æрцыд цæрæн-коммуналон хæдзарады министрадмæ. Дзуаппон гӕххӕтты бæрнад басаст, электрон хызты хӕрзхъӕддзинад хуыздæр хъуаг кæй у, ууыл.
Аххосаг ис уынгæн йæхи мидæг, бӕлвырддӕр та йӕ уавӕры. 1990-ӕм азты хауди дыргъдæтты иугондмæ. 10 азы размӕ йын йæ нысаниуæг ивын райдыдтой, фæлæ, цӕрджыты ныхӕстӕм гӕсгӕ, хъуыддаг размæ нæ ацыд.
“РОССЕТИ ЦÆГАТ КАВКАЗ” — “СЕВКАВКАЗЭНЕРГО”-йы ИНФОРМАЦИ:
Дыргъдæтты æнæкоммерцион æмбалад “Северная”-йы (уыимӕ Къудухты Б. уынг) цы электрон тыхдӕттæг телтæ ӕмӕ трансформаторон дӕлстанцӕтӕ ис, уыдон “Россети Цæгат Кавказ”-ы бæрны не сты. Амынд хызтӕ бабиноныг кӕныны ӕмӕ рацарӕзты бӕрн хӕссы исбоны хицау.
“Россети Цæгат Кавказ”-ы филиалы специалистты хӕстӕм, куыд территориалон хызаразӕг организаци “Севкавказэнерго”, афтӕ хауы ӕрмӕст хи хъарутӕй уавӕрыл фӕтых уӕвын кæй бон нæу, ахæм æндæр цæрæджы электрон хызты хӕдзарады объектты техникон аиппытæ аиуварс кӕнын. Техникон аиппытæ аиуварс кӕныны уынаффӕ, фӕткмӕ гӕсгӕ, рахæссы Республикӕ Цӕгат Ирыстон-Аланийы электрон тыхӕй ифтонг кӕныны æдасдзинады регионалон штаб.
Уавæр бамбарыны тыххӕй фæсидтыстæм горӕты администрацимӕ ӕмӕ энергетиктӕм. Рабӕрӕг: горӕтимӕ физикон ӕгъдауӕй баиу уӕвгӕйӕ, Къудухты Бесикы уынг юридикон ӕгъдауӕй дарддӕр цӕры дыргъдарыны ӕмбалады закъонтӕм гӕсгӕ. “Россети” дипломатон ӕгъдауӕй бамбарын кодтой: ацы зӕххыл цы цæджындзтæ ӕмӕ дӕлстанцӕтӕ ис, уыдон сӕхи не сты. Уӕдӕ сагъӕсты уаргъ та цӕрджытӕн сӕхи уӕхсчытыл ӕрӕнцайы.
Уӕвгӕ та мэрийы бамбарын кодтой: уавӕр райхалæн ис. Цӕмӕй юридикон ӕбӕрӕгдзинады уаргъ цæрджыты рагъӕй ист æрцæуа, уый тыххӕй сæ хъæуы горӕты ‘рдæм фыццаг къахдзӕф акӕнын. Коллективон курдиат суыдзæн, официалон статусмӕ дуар чи байгом кӕна, ахæм дæгъæл. Дарддӕр администраци зӕрдӕ ӕвӕры æххуысæй: фыццаг къухфыстæй кӕронбӕттӕны уынаффӕйы онг. Уӕдӕ Къудухты Бесиккы уынджы нау цæмæй горӕты наулӕууӕнмӕ аленк кӕна, уымæн та хъӕуы дымгӕ — уыцы дымгæ та у цӕрджытӕн сӕ иумæйаг фӕндон.
