Дзуры сывӕллӕтты рӕвдауӕндоны радио. Змейкæйы сабитæ æрмæст хъазгæ нæ, фæлæ ма къуыри дыууæ хатты хабæрттæ цæттæ кæнынц. Республикæйы фыццаг æмæ иунæг сывæллæтты радио “Радуга-ФМ”-ы чысыл студи сбӕлвырд кодта: цӕмӕй дӕ фехъусой, уый тыххӕй хъуамӕ æнæмæнг хистӕриуӕг ма кӕнай. Æрмæст кънопкӕ нылхъив ӕмӕ зӕгъ: “Уæ райсом хорз, зынаргъ радиомæхъусджытæ!”.
Ацы рӕвдауӕндоны райсом касӕй нӕ, фӕлӕ микрофонты басгӕрстӕй райдайы. Цалынмӕ се ‘мгӕрттӕ сæ фынтæ кæронмæ уынынц, уӕдмӕ лæппутæ æмæ чызджытæ сӕхи цӕттӕ кӕнынц комкоммӕ эфирмӕ рацӕуынмӕ. Ам байгом сывӕллӕтты фыццаг радиостанцӕ Ирыстоны “Радуга-FM”.
Æмæ мæнæ эфиры студи — ӕдзӕм. Фондзаздзыд “амонæг” ӕнхъӕлмӕ кӕсы “режиссеры” сигналмӕ. Ацы уысм хистæр къорды хъомылгӕнинаг нӕу, фӕлӕ сывӕллӕтты рӕвдауӕндоны сӕйраг хъӕлӕс.
Хъуыды фӕзынд сабидоны разамонæгмæ: куыд сахуыр кӕнæн ис сывӕллӕтты бӕлвырд, нывыл дзурын ӕмӕ адӕмы раз ма тӕрсой? Дзуапп ссардтой технологиты. Ныр тыргъты хъуысынц къордты ног хабӕрттӕ æмæ хæстæгдæр фидæнмæ нысантæ.
Хъомылгæнджытæн радио хуымӕтӕджы хъазт нӕу. Уый у ныхасы, логикӕйы ӕмӕ командӕйы куысты рӕзт. Сывӕллӕттӕ сӕхӕдӕг дæр равзарынц темӕтӕ: бæрæгбæттæй — фӕндаджы ӕгъдӕутты онг.
Сывӕллӕттӕн уыцы хъӕлӕс динамикӕй у ӕцӕг диссаг. Ам нӕй карз диктортӕ, æрмæст зӕрдӕбын ныхас. Æмдзæвгæты рӕдыдтӕ кӕнӕ ӕвиппайды худын эфирæй лыггонд нæ цæуынц — бынӕттон радиойы сӕйраг фидыц дӕр уый мидӕг ис.
Комкоммæ эфир — къуыри дыууæ хатты: къуырисæр æмæ майрæмбоны. Фыццаг уал радзурынц къуыримæ нысанты тыххæй, уый фæстæ сын хатдзæгтæ скæнынц. Ныййарджытӕ цин кӕнынц: ныр рæвдауæндоны цардӕй ног хабӕрттӕ къултыл ауыгъд стендтæй нӕ базонынц, фӕлӕ сӕхи сывæллæтты радиохъусынгæнинæгтæй.
Чи зоны, 15-20 азы фӕстӕ ацы хъӕлӕстӕ федералон уылæнтыл айзæлой. Ныр та уал сӕйраг хъусджытӕ — мадӕлтӕ, фыдтӕ ӕмӕ уарзон хъомылгӕнджытӕ.
Дзæдзойты Фатимæйы æрмæг
