Комæй-коммæ

Ирыстоны сбæрæг кодтой бындурон цæрæн пунктты номхыгъд. Бахастой сæм Дыгуры район дæр. Цы нысан ис уыцы ногдзинадæн æмæ цæрджытæн цæмæй фæахъаз уыдзысты? Уæвгæ, адæмæн пайда цы у, уый æнæкоммерцион организациты уæнгтæ хорз фæзонынц. Алагиры хæрзаудæн Фонд йæ размæ цавæр хæстæ æвæры? Æмæ Хуымæллæджы скъоладзаутæ тыхджындæр кæм разындысты? Æппæт уыдæттыл дзурæм нæ программæ «Комæй коммæ»-йы.

Æхсæнадон транспорты куыст Æрыдоны районы æмæ «Хонгæ кафты бæрæгбон» Ногиры. Æхсæнадон транспорт æмæ культурон фарстатыл ныхас цæуы программæ «Комæй коммæ»-йы. Транспорты куыстимæ баст ногдзинæдтæ районтыл куыд ахадынц, ууыл нæ программæйы ныхас цæудзæн æппынæдзухдæр. Ныр уал не `ргом здахæм Æрыдоны районмæ.

Елхоты, Змейкæйы, Даскъоф æмæ Кæрдзыны скъолатæ бафæзминаг цæмæй сты? Нырыккон домæнтæн дзуапдæттæг ахуыргæнæндæтты ном хæссынæй сыл уæлдай уаргъ æвæрд æрцыд, æви сын уыцы хъуыддаг æрмæст разæнгарддзинады хос у? Хуымæтæг хъæуккаг скъола каст цы елхотаг лæппу фæци, уый Мæскуыйы уæлдæр скъолатæй иуы Кировы районы рæзтæн цы æрхъуыды кодта? Стæй зынгсирвæзтытæ куыд фæзындзысты Мызуры цæрджытыл æмæ æрдзыл? Уыдæттыл дзырдтам нæ программæйы.

Ивгъуыд афæдзы хатдзæгтæм гæсгæ, æппæтæй тыхстдæр фарстытæ баст уыдысты æхсæнадон транспортимæ стæй хъæуты доны фарстимæ. Мах уыцы хъуыддæгтæм рæстæгæй-рæстæгмæ не `ргом здахдзыстæм ног аз дæр. Раст а-изæр дзырдтам Алагиры доны уавæрыл. Уымæй уæлдай ма æрныхас кодтам, туризмы рæзт хъæуккæгтыл куыд фæзындзæн æмæ сын цы пайда æрхæсдзæн, ууыл. Стæй, Црауы цæрджытæ Ногбоныл куыд сæмбæлдысты æмæ бæрæгбоны лæвæрттæ кæмæн ратдзысты, ууыл.

Ацы хатт нæ программæ чысыл йæ арæнтæй ахызти. Ацы аз уыди фæстаг, æмæ йæ банымадтам хатдзæгоныл. Нæ студимæ та фæхуыдтам, сгуыхтдзинæдтæ чи равдыста, уыдоны.

“Æхсæнадон транспорты куыстыл дзурæм, фæлæ хъуыддаг хуыздæр нæ кæны». Афтæ нымайынц нæ республикæйы цæрджытæ. Уавæр иртасæм специалисттимæ. Уæдæ Алагиры скъолайы минæвæрттæ та Кремлы кадетон балмæ ацæуыны тыххæй цавæр сгуыхтдзинæдтæ равдыстой æмæ цæмæй фæцыди сæ зæрдæмæ нæ бæстæйы сæйраг залы вальс æркафын? Уый тыххæй дзурæм нæ программæйы.

Астæуккаг ахуырады профессионалон скъолатæн фæци фылдæр гæнæнтæ. Сæ бон уыдзæн сæхи конд продукци уæй кæнын. Хорздзинад ракæнынмæ цæттæ чи у, уыдон сты æнæкоммерцион организацитæ. Куыд кусынц районты? Ууыл дзурæм нæ программæйы.

Æрæфы районы Æрæфы доны цур 112 азы размæ æрбынат кодта хъæу Дигоро-Алексеевское. Ныртæккæ кæддæры фæрнджын æмæ аив бынат хæссы ном Æхсæрысæр. Абон хъæу цæмæй цæры, æмæ дзы чи баззад, уыдоны стырдæр бæллиц цавæр у? Уый иртасæм нæ программæйы.

Æрдзон фæзындтытæ хохрæбын цæрæг ирыстойнæгтыл куыд ахадынц, стæй бирæ мыггæгты минæвæрттæ хæхбæсты фæстæмæ сæ фыдæлты мæсгуытæ сног кæнынмæ куыд хъавынц? Ууыл ныхас цæуы программæ «Комæй коммæ»-йы.

Нæ республикæйы æрыгондæр хъæутæй иу у Донгæрон. Абон ыл дзурæм нæ студийы. Уымæй уæлдай ма бæстон æрныхас кæндзыстæм, нæ республикæйы фæсивæдон экологон змæлд кæй рæзы æмæ ныфсджын къахдзæфтæ кæй кæны, ууыл. Уæвгæ канд фæсивæды `хсæн нæ, фæлæ ма рæвдауæндæтты чи ис, уыцы сабиты `хсæн дæр. Куырттаты комы æмæ Дыгуры районы минæвæрттæ уымæн уыдзысты æвдисæн.