Абон Дзæуджыхъæуы байгом ис зонады æппæтуæрæсеон æрвылазон фестиваль. Мадзал арæзт цæудзæн æртæ боны – 12-æмæй 14-æм октябрмæ. Форумы æппæт мадзæлттæ арæзт цæудзысты нæ республикæйы уæлдæр ахуырадон кусæндæтты. Йæ архайджытæ та систы зонады кусджытæ, студенттæ, скъоладзаутæ, уæлæмхасæн ахуырады центртæ, культурæйы артдзæстытæ. Æдæппæтæй 7 мин архайæджы.
Фестивалы сæйраг нысан у зонадыл фылдæр фæсивæды бафтауын, рæзгæ фæлтæры зæрдæты иртасæн куыстмæ цымыдисдзинад æвзæрын кæнын.
Форумы программæмæ гæсгæ, арæзт цæудзысты равдыстытæ, лекцитæ, конференцитæ, семинартæ æмæ афтæ дарддæр. Уымæй уæлдай-ма фестивалы фенæн уыд нæ республикæйы уæлдæр ахуырадон кусæндæтты, техникумты æмæ скъолаты æнтыстдзинæдты æвдисæнтæ.
