Абон Уæрæсейы бæрæг кæнынц мыхуыры бон. 13-æм январы 1703-æм азы рухс федта фыццаг уырыссаг газет. Нымад у, уæрæсейаг журналистикæйæн бындур цы бон сæвæрдтой, ууыл. Уæдæй абонмæ газеттæ æмæ журналтæ зонгæ кæнынц адæмы фæстаг хабæрттæ æмæ аивадон уацмыстимæ. Кæд мыхуыры къабаз зындзинæдтæ ӕййафы, уæддæр адæмы цæсты ахады.
Газет «Рахизфарсы цард»-ы фыццаг тираж рацыд 1933-æм азы февралы. Уæд редакци уыд бынтон æндæрхуызон. Уацхæсджытæ се ‘рмæг фыстой мыхуыргæнæн машинæтыл. Нæдæр компьютертæ уыд, нæдæр интернет. Журналистикæйы æцæг классикæ. Уæдæй нырмæ газеты ном дыууæ хатты ивд ӕрцыд, фæлæ районы цæрджытæн ахсджиаг ӕрмӕг хъусын кӕнын кæддæриддæр уыд сӕйрагдӕр хъуыддаг.
Фыдыбæстæйы Стыр хæсты рæстæг газеты рауагъд не ‘рлæууыд. 1990-æм азты та «Рахизфарсы цард» рахызти хуызджын мыхуырмæ. Ныр газет цæуы къуыри æртæ хатты. Йæ тираж у цыппар мин экземпляры. Уымæй уæлдай, «Рахизфарсы цард»-æн ис сæрмагонд фарс социалон хызæгты. Сæйрагдæр та — иузæрдион кæсджытæ.
Фыццаг ирон газет рухс куы федта, уæдæй нырмæ рацыд æнусæй фылдæр. Дзæуджыхъæу кæддææриддæр уыд Кавказы журналистикæйы егъаудæр центр. Суанг ма революцийы агъоммæ горæты номхыгъды уыд сæдæ рауагъдады бæрц. Уыдонæй иуæндæс — иронау. Газет «Рæстдзинад» дæр 2 азы фæстæ сбæрæг кæндзæн йе ‘нусон юбилей.
Ацы аз 85 азы юбилей бæрæг кæны сывæллæтты журнал «Ногдзау». Фыццаг хатт мыхуыры рацыд 1937-æм азы. Уыцы рауагъды оригинал ныр ис Ирон литературæйы музейы. Абон «Ногдзау» у республикæйы зындгонддæр журнал. Йæ фылдæр хай арæзт у кæсджытæн сæхи æрмæгæй. Уæдæ дзы сывæллæтæн æгъдæуттæ æмæ культурæ базонæн дæр ис.
Социалон хызæгтимæ быцæу кæнын зын у. Фæлæ дзуапдæттæг комитеты сæрдары ныфс ис, Уæрæсейы мыхуыры фидæн зæрдæхсаинаг кӕй нæу.
Мыхуыры рауагъдад у нæ бæстæйы журналистикæйы корифей. Уыдон райдыдтой истори фыссын. Радио, телеуынынад æмæ интернет уый фæстæ фæзындысты. Фæлæ уацхӕсджытӕн сæ дæсныйадмæ уарзондзинады фæрцы мыхуыры дзыллон информацион фæрæзтæн кæддæриддæр ис сæхи кæсæг.
