Абон бæрæг кæнынц Педиатры æппæтадæмон бон. Баиу иннæ бæрæгбон – Сывæллоны бонимæ. Сывæллæтты дохтырты куыст ахадгæ у, стыр хæс сыл æвæрд ис. Канд сабиты æнæниздзинадмæ сæ цæст нæ дарынц, фæлæ ма сæ иумæйаг уагмæ. Ацы дæсныйадæн аргъ кæнынц нæ республикæйы специалисттæ дæр. Профессионалон бæрæгбоныл сæ фылдæр абон сæмбæлдысты сæ куысты бынæтты.
Доййаты Вероникæйы кабинетæй сывæллоны кæуын никуыма райхъуыст. Æрыгон дохтыры къухты сабитæ сæхи хорз фенкъарынц. Вероникæйæн алы сывæллон дæр адджын у. Йæ ныхæстæм гæсгæ, сывæллæтты дзæбæх кæнын уыд йæ сабибонты бæллиц. Медицинон академи каст фæци ацы аз. Бафæндыд æй уый фæстæ кусынмæ бацæуын поликлиникæмæ.
Педиаторы дæсныйад равзæрста Тегаты Заур дæр. Уый иу бон дæр нæ фæфæсмон кодта, ацы дæсныйадыл кæй фæцалх ис, ууыл.
Дохтыры ныхæстæм гæсгæ, куыст се ’нцонтæй нæу. Зындзинæдтæ дæр дзы вæййы. Фæлæ сæ чысыл пациентты уынд сын у стыр æххуыс. Дохтыртæ зæгъынц, поликлиникæйы цæрынц æнгом бинонты хуызæн. Кусынц иу къорды. Зын сахат алкæддæр кæрæдзийы фарсмæ сты.
Тауитты Ларисæ медицинæйы къабазы кусы 20 азæй фылдæр. Йæ ныхæстæм гæсгæ ацы дæсныйад у зын, фæлæ йемæ хæссы удыбæстæ.
Се ’уæхсчытыл стыр хæс кæй ис, уый дызæрдыккаг нæу. Сывæллæтты цард вæййы дохтырты къухты. Сæйрагдæр у сабитæм уарзондзинад. Уыдон та йæ алкæддæр фенкъарынц.
Пелиты Сабинæ
