20 сфæлдыстадон къорд æмæ 400 фæндыруарзæгæй фылдæр æгас Цæгат Ирыстонæй. Аивадæн гæрæнтæ кæй нæй, уый иу сценæйыл æвдисынц æвзонг æхсæзаздзыд музыканттæ æмæ фæлтæрдджын, адæмæн уарзон артисттæ.
Фарон уыд егъау æркаст. Республикæйы музыкалон коллективтæ райстой, кæнæ бахъахъхъæдтой адæмон ансамбльтæ æмæ оркестрты ном. Ныр сæ гæнæнтæ æвдисынц фестиваль “Ирон фæндыр”-ы.
Фестиваль цæуы æвдæм хатт. Саардтой дзы зындгонд композитор Æлборты Феликсы рухс ном. Йæ зындгонд уацмыстæ цæрынц кинонывтæ “Ах, любовь”, “Во всём виновата Залина”, оперæ “Фатимæ”-йы, бакуыста “Мæхæмæты зарæг”-ыл, бирæ зарджытæ æмæ цæгъдтытæ æрæмысыд ирон фæндырæн. Уымæй уæлдай, ныффыста Хуссар Ирыстоны гимн. Ирон адæмы музыкалон аивады фарстатыл цы куыст бакодта, уый бындурыл та рацыд чиныг “Музыкальная культура осетин”.
Фестивалы режиссер-æвæрæг — Цæгат Ирыстоны культурæйы сгуыхт кусæг Битарты Ларисæ. Адæмон сфæлдыстады хæдзар æй сарæзта республикæйы Культурæйы министрад æмæ Рахизфарсы районы администрацийы æххуысæй.
