Джидзæлаты Хазбийы кусгæ бон сæумæрайсом райдайы. Хъæугæ техникæ æмæ гæрзтæ æрæмбырд кæны æмæ размæ. Абон æвæры информацион рухсгæнæн. Куы иу ссудза, уæд шофыртæ зондзысты — фæзилæны фæстæ чидæр ис. Нæлгоймаг ацы куыст дыууæ сахатмæ бакæндзæн. Зын æмæ ахсджиаг архайд. Фæндагон змæлды архайджыты æнцойдзинад æмæ æдасдзинад уымæй аразгæ у.
Адæймаджы æппынæдзух фæндæгтыл рад хæссынæй рухсынысантæ фервæзын кодтой. Нырыккон светофор æрмæст йæ хуызтæ нæ ивы, фæлæ рæстæг нымайы, сигналтæ дæтты, змæлды здæхт æмæ адæймаджы цыды анимаци æвдисы. Æмæ ацы æууæлтæ цæмæй æнæ атиппытæй кусой, ууыл специалисттæ архайынц æнæрлæугæйæ. Командæйы 4 адæймаджы едтæмæ нæй, фæлæ алцæуыл дæр æххæссынц. Цæрджыты хъæстытæ дæр сæхæдæг исынц. Арæхдæр хъæндзинæдтæ баст сты электрон тыхы æвиппайды ивддзинæдтæ æмæ зæронд телтимæ.
Историйы гуырæнтæ та сты дард 1868 азы. Инженер Джей Найт фыццаг прототип сарæзта Лондоны парламенты цур. Фæлæ хъуыддаг рæстæгмæ айрох. Æдасдæр автоматикон хуызтæ фæзындысты дæсгай азты фæстæ. 1914 азы америкаг Кливленды сæвæрдтой нырыккон светофоры “фыдæлы”. Уыди йын дыууæ хуызы — сырх æмæ цъæх. Иу сæ иннæйы куы ивта, уæд хъуысыд сигнал. Абон Дзæуджыхъæуы мин рухсынысанæй фылдæр ис. Сæ фæрцы шофыртæ æмæ фистæгæйцæуджытæ æдасæй цæуынц фæндæгтыл.
