Тохы раззагдæр бынатмæ уазнывтæ арвитыны тыххæй æрбауад æмæ ныр дыууæ азы дæргъы æрвылбон дæр ам вæййы Галина Митяева. Абон ис штаб “Мы вместе”-йы раззагдæр бархионты хыгъды. Ныртæккæ ам аразынц сæрмагонд æфсæддон операцийы бынаты нæ фæсивæд сæ техникæ æмæ акъоппытæ цы æмбæхсæн хызтæй бамбæрзынц, уыдон. Алы сынк дæр уый дæнцæг у, æмæ, хæстонтимæ иумæ, Уæлахиз хæстæг кæны фæсфронт чи баззад, уыдоны ныфсы тых дæр”, — зæгъы сылгоймаг.
14 азы Мидхъуыддæгты министрады баслужбæ кодта. 25 азы æфсадæн снывонд кодта йæ къай. Æфсæддон тематикæ æмæ патриотизм Галина Митяевайы зæрдæйы уæлдай бынат ахсынц. Суанг ма йæ хъæбулы хъæбулты дæр æрбакæны штабмæ.
Иууылдæр иумæ сæрмагонд операцийы бынатмæ арвыстой 500 æмбæхсæн хызæй фылдæр. Æмæ уыдонæн гуманитарон æрвыстæгты уæлдай ахсджиаг бынат ис. Фæлæ уæддæр æппæтæй зæрдæагайгæдæр у, Уæлахизы хъуыддагмæ се ‘вæрæн сабитæ кæй хæссынц, уый. Мæнæ ацы хъазæнтæ æрбахæссынц, цæмæй сæ ам салдæттæн базтæ бахуыйой. Штабмæ арæх æрбацæуынц скъоладзаутæ дæр.
Ам ис нæ хæстон фæсивæды æрвылбоны царды цы бахъæуы — акъоппы цырæгътæ. Æрмæст рухс æмæ хъармы нысан сын нæй, фæлæ ма сыл рахсидынц дон, схъарм кæнынц хæрианг, бахус кæнынц дзабыртæ. Штабы фарсмæ æппынæдзух æрбалæууы Адæмон фронт. Уыдон сæрмагонд операцийы райдианæй æххуыс кæнынц хæстонтæн дæр æмæ сабыр цæрджытæн дæр. Фыццæгты Змæлды бархионтæ та æрбахæссынц хус хъæрмхуыппытæ æмæ кастæ.
Æмбæхсæн хызтæ бийынц скъолаты дæр. Алы æрвыстæгимæ дæр батухынц сывæллæтты фыстæджытæ. Сæ ныхæстæ — æнæхин æмæ хъæрмуд, стæй нæ фæсивæд тагъд сæ бинонтæм кæй æрыздæхдзысты, ахæм æнæфæцудгæ уырнындзинадæй дзаг.
