8 азы размæ фыццаг хатт арвмæ стахт Нарты зæрватыкк, уый сси национ телеуынынады символ. Уæдæй абонмæ кусæм æнæрлæугæйæ, нырыккон алывæрсыг студитæ, уæрæх авналæнтæ æмæ сæ куыстыл æнувыд специалситтæ, цæттæ кæнынц дæсгай проекттæ, цымыдисаг равдыстытæ ирон æмæ уырыссаг æвзæгтыл. Æппæт архайды сæйраг нысан – телевизормæ кæсджыты зæрдæтæ балхæнын. Ацы хатт нæ бæрæгбоны традицион æрмæг дæр баст у уыдонимæ.
Телеканал Осетия Ирыстон кусы æнæрлæугæйæ, равдыстытæ цæттæ кæнынц куыд тематикæйы хайады, афтæ информацион службæйы. Республикæйы ахсджиагдæр цаутæ бон фондз хатты, уырыссаг æмæ ирон æвзæгтыл. Редактортæ, продюсертæ, амонджытæ æмæ, кæй зæгъын æй хъæуы, уацхæсджытæ. Уыдон уæлдай æнæвдæлон сты. Ныртæккæ дæр цæттæ кæнынц сæ æрмæджытæ. Нæ телеуынынады алы кусæг дæр æнæзæрдæхудт лæггад кæны нæ уарзон телевизормæ кæсджытæн. Æмæ нын уыдон та цымæ цавæр аргъ кæнынц?
Æрвылаз нæ телекомпанийы равзæрды бон радзурæм æмæ равдисæм фæскадры кусджыты, раргом кæнæм нæ архайды сусæгдзинæдтæ. Ацы хатт нæ традици фæивтам, æмæ цалынмæ ме ‘мкусджытæ эфир æмбырд кæнынц, уæдмæ æз та балцы ацæудзынæн. Суазæг нæ кæндзæн, нæ равдыстытæ кæмæн цæттæ кæнæм, уыцы мингай телевизормæ кæсджытæй иу. Уый тыххæй сахаты æмгъуыдæ балæууыдыстæм Хъæдгæроны.
Гугкаты Хъазыбег уазджытыл æхсызгонæй сæмбæлд. Æртæккæ дæр ма, уæ телевизоры куы уыдтон, зæгъгæ. “Осетия-Ирыстон” нæлгоймаг хоны “Нæхи канал”. Кусын та йæ скæны куыддæр ын уæгъд рæстæг фæзыны, афтæ. Цавæр равдыст дзы цæуы, уый та хорз зоны сахатмæ скæсгæйæ дæр.
Бинонтæм ис цалдæр телевизоры, фæлæ ацы агъуысты кæцы ис, уымæ фæкæсы сæрмагондæй Хъазыбег, цæмæй йæ “Нæхи каналмæ” кæсын мачи хъыгдара, зæгъгæ.
“Фæзминаг кæстæртæ”, “Фæрдгуытæ”, “Йæ рæстæгыл”, уыдонæй фылдæр та Хъазыбег фенхъæлмæ кæсы музыкалон равдыстытæм. Алы программæ дæр кæй зоны, уый иу хъуыддаг, фæлæ йын æнæмæнг ис йæхи уарзондæр амонджытæ дæр. Стыр аргъ сын кæны алыхуызон фарстатыл кæй дзурынц, сæйрагдæр та нæ мадæлон æвзагыл.
Гугкаты Хъазыбегыл цæуы 72 азы. Уарзы музыкæ, ахуыр кодта алыхуызон инструменттыл цæгъдын, зарын. Ныртæккæ дæр ис музыкалон къорды хыгъды, фæархайы алыхуызон æхсæнадон мадзæлтты. Фæзминаг хистæр æмæ фæлмæн баба. Хъазыбег æн ис чызг æмæ лæппу, фондз та хъæбулы хъæбултæ. Йæ кæстæрты дæр æмхиц кæны нæ æгъдæуттæ æмæ культурæмæ. Махæн та æхсызгон у нæ куыстæн нын Хъазыбеджы дæнцæгыл хистæртæ стыр аргъ кæй кæнынц, уый.
Дæсгай алыхуызон проекттæ, программæтæ, уырыссаг æмæ ирон æвзæгтыл. Амонджытæ, уацхæсджытæ æмæ редактортæ фæллой кæнынц, цæмæй телевизормæ кæсæгæн уа цымыдисаг. Сæ зæрдæтæм сын фæндаг кæй ссардтам, ууыл дзурæг та сты нæ рейтингтæ, æрвылаз телеканал “Осетия-Ирыстон” вæййы раззагдæр каналты ‘хсæн. Кæсгæ та нæм канд Ирыстон æмæ Уæрæсейы нæ кæсынц, фæлæ ма фæсарæнты дæр.
8 азы æмæ мингай эфиртæ, равдыстытæ, алыхуызон æнкъарæнтæ, фембæлдтытæ. Йæ куыст удуæлдайæ чи уарзы, уыцы сфæлдыстадон къорд дарддæр дæр лæггад кæндзæн нæ уарзон телевизормæ кæсджытæн.
