Национ кæфтытæ – ирон адæмæн сты сæ сконды бындуртæ, нæ культурæйы ахсджиаг хай. Чызджыты аив æмæ рог змæлд та æвдисæн сты æгъдау æмæ æфсармæн.
Лæппуты кафты та фенæн ис ныфсхаст æмæ уæнгрогдзинад. Æмæ ма ноджы бинонтæ æмæ Райгуырæн бæстæ бахъахъхъæнынмæ цæттæдзинад.
Ансамбль “Фидæн” фыццаджыдæр — йæ архайджытæ. Уыдон ыл бирæ азты сты æнувыд. Уымæн хорз дæнцæг – Хетъеты Дианæ. Чызг кафы дæс азæй фылдæр. Уыцы рæстæгмæ йын къорд сси бинонты хуызæн.
Хъæздыг ивгъуыдимæ ансамблæн йæ фидæн ис рæзгæ фæлтæры къухты. Ныртæккæ дæр æвдисынц æнувыддзинад æмæ сæ архайдмæ уарзондзинад. Стефания æмæ София æрвылбон архайынц сæ арæхстдзинады райрæзтыл, сæ бæллиц у фидæны стыр сценæмæ рацæуын.
Къорды ‘хсæн хæлар ахастдзинæдтæ. Уыимæ ма дисциплинæйы тыххæй дæр нæ рох кæнынц. Фæлтæрдджын артисттæ кæстæрты æрмæст хореографийыл нæ ахуыр кæнынц. Разæнгард сæ кæнынц нæ культурæ æмæ æгъдæуттæ зонынмæ.
Фæсивæдон политикæйы фæлгæты Краснодары уыд сæрмагонд концерт. Йæ сæйраг нысан – культурон æмæ хæлар бастдзинад фидар кæнын. Сæ арæхстдзинад равдыстой дыууæ кары къордтæ: сæйраг æмæ æвзонг хъомылгæнинæгтæ. “Фидæн” бацæттæ кодта ирд æмæ егъау программæ.
Къорды разамонджыты ныхасмæ гæсгæ гастрольтæ къухы бафтыдысты Марат Полковойы фæрцы. Цæгат Ирыстонæй рацæуæг æппынæдзух æххуыс кæны нæ культурæ бахъахъхъæныны æмæ йæ æндæр регионты парахат кæныны хъуыддаджы.
Ныртæккæ “Фидæн” дарддæр йæхи цæттæ кæны. Æртæ мæйы фæстæ къорд иу сценæмæ рацæудзæн Хъæрæсе-Черкессийы адæмон ансамблимæ.
